YOU Inc. seminar organisa pa Rotaract Club of Aruba a celebra su prome lustro cu e tema nabegando exito

Posted on June 06, 2019, 9:52 pm
6 mins

ORANJESTAD, Aruba    

Diasabra, 25 di Mei 2019, Rotaract Club of Aruba a presenta e di 5 edicion di YOU Inc. Seminar na Hyatt Regency Aruba ballroom, un evento sold out. Un mainta informativo y educativo cu a wordo guia door di Rotaractors Kapil Sawilani y Sunny Dodia cu a fungi como e maestronan di ceremonia.

Por medio di ‘YOU Inc. Seminar’ Rotaract Club of Aruba kier duna bek na e comunidad di Aruba den e area di desaroyo personal y profesional, creando asina un plataforma cu temanan educacional na un prijs rasonabel. E tema di e seminario e aña aki tabata “Navigating Success”, nabegando exito. Cada persona tin e abilidad pa por compronde nan emocion y usa esaki como un guia pa yega e siguiente nivel di nan bida, door di simplemente aplica e strategianan presenta na YOU Inc Seminar.

E mainta a start cu palabra di Ryon Dijkhoff, Presidente di Rotaract club of Aruba pa aña 2018-2019, cu a yama tur un bon bini y alabes a duna un discurso corto di e meta y proyectonan di Rotaract Club of Aruba. Kapil y Sunny a sigui e mainta cu algun chiste como “ice-breaker” y alabes a introduci Business Strategy Researcher na ATA y Co-host di e programa radial Career IQ, Kareline van der Linden cu a fungi como moderador di e panel.

E panel aki a consisti di orador local y Caribense, den persona di Jo-Anne Arends Air Service Development Manager na AAA, Christel Croes Training Manager na SETAR y Earl Balborda fundador di The Eunoia Institute na Curacao. Tur panelista,,un pa un, a tuma e escenario, unda cu a dialoga riba e  topiconan di inteligencia emocional cu Earl Barborda, e aspecto humano den technologia cu Christel Croes y e abilidad con pa balansa y maneha e diferente aspecto di trabou y bida personal cu Jo-Anne Arends.

Como orador internacional cu a bin for di Canada tabata presente Sara J. Ross, un experto den inteligencia emocional cu ta boga pa vitalidad den liderazgo. Sara J. Ross a inspira tur presente cu su presentacion cu a regarda e siguiente areanan: “emotions are powerful guides” y “the science of emotional intelligence”. Diferente strategia a wordo presenta na e audiencia con nan por compronde nan emocion mas mihor, y asina usa e informacion aki den tur situacion di nan bida. Sara J Ross a duna informacion practico y facil pa por nabega tur fase di exito den bida.

Pa termina e diasabra inspirativo aki, Tiana de’Lisle, e lider di e comision organisatorio pa YOU Inc. 2019 a gradici tur e participantenan di e seminario, e la enfoca riba e importancia di e tempo cu cada participante a inverti pa desaroya nan mes. Alabes a gradici e comision organisatorio: Kapil, Katinka, Rebecca, Amedée, Shawn, Saminah y Kareline pa nan trabou den e delaster lunanan y alaves tur e miembronan di Rotaract Club of Aruba pa nan yudansa pa cu e proyecto aki.

Rotaract Club of Aruba ta sumamente satisfecho di por a brinda un bes mas un seminario valioso na e publico di Aruba cu sigur a wordo bon atendi. Despues di e seminario durante un rato social, hopi participante a comenta di a keda inspira y sigur movi door di e programa.

Rotaract Club of Aruba ta extende su palabra di gradicimento na e main sponsors: Aruba Tourism Authority, SETAR NV, Reina Beatrix International Airport, Hyatt Regency Aruba Resort Spa & Casino, Elite Productions & Entertainment, Amsterdam Manor Beach Resort Aruba y Playa Linda Beach Resort.

Sin ayudo di e siguiente stakeholders nos no por a logra e vision cual ta: Rotary Club of Aruba, Sebastian Hofer Film & Video, Kok Optica, Nature’s Discount Aruba, Fantastic Gardens Aruba, D&D Events, EQ3 Aruba, Emco, Futura, Aruba Aloe, Pelican Nest Seafood Grill, Pelican Adventures, Dyon Center, Aruba Trading Company, Oduber Agencies NV, Romar Trading Aruba, Career IQ Aruba, Focus Aruba Magazine, Office Systems Aruba, Gianni’s Group, Cool FM 98.9 Aruba, Caliente 90.7 Fm, Power 101.7 FM, Hits 100.9 FM.

Sin lubida tur e empresanan local cu a inverti den e crecemento personal di nan empleado y cu a cumpra admision pa YOU Inc 2019 y naturalmente tur individuo pa nan aporte. Rotaract Club of Aruba ta un grupo di young professionals entre edad di 18 y 30 aña cu ta organisa varios proyecto beneficiando e comunidad di Aruba.  Rotaract Club of Aruba ta forma parti di e famia di Rotary International, cu ta un red internacional cu tin e meta pa trece cambio positivo den comunidad y paisnan rond di mundo. Por bishita e pagina di Facebook, Instagram of website di Rotaract Club Aruba, pa asina por keda na altura di tur actividad.

Spread the love

Leave a Reply

  • (not be published)