ORANJESTAD, Aruba

 

Mayoria di Arubiano kisas no conoce e revista NATURE y nunca a tende di e homber Anthony Brown.Pero pa e revista NATURE menciona como un di e diez personanan influyente di 2018 ta un honor masha grandi mes. Mas orgulloso nos mester sinti pasobra Anthony Brown ta un científico Arubiano trahando na Hulanda. E ta specialisa den “star mapper”, un specialisacion cu aki na Aruba e no tin caminda pa cana pa yega mas leu, pa cual e ta estableci na Hulanda.
E revista Nature a wordo publica pa prome biaha na 1869, y ta wordo considera e revista científico multidisciplinario mas importante di mundo. Nan mes ta bisa cu nan ta publica e miho “review”nan di e tema di sciencia.
Brown ta wordo describi door di NATURE como un Astronomo trahando den “background” cu a coordina e informacion tan spera di Gaia riba Milky Way. Pa hopi e splicacion aki ta zona manera Chines, pero pa esnan di ciencia esaki ta algo grandi.
Pa hopi Astronomo, Pasco e aña’ki a bini riba 25 di april pa exactamente 10’or (Coordinated Universal Time). Esey ta momento cu cientificonan cu e agencia espacial Europeo Gaia Mission a publica su prome data di gran magnitud: un catalog di informacion di 551-gigabyte detayando e posicion y movecion di mas cu 1.3 biyon strea.
Mientras cu Astronomonan tabata yena di entusiasmo pa tira nan mes den e lama di informacion aki, e Arubiano Anthony Brown por a bisa unicamente cu e ta “cansa”. E ta un Astronomo na Observatorio di Leiden na Hulanda. El a guia e proyecto “Data Processing and Analysis Consortium”, un grupo di mas di 400 investigado cu a bin ta procesando e datonan pa añanan largo. E nave espacial Gaia, cu a wordo lansa na 2013, ta spin pa scan e shelo y ta graba e señalnan di strea cu ta dal den e camara. Na tera mester tin sistema sofistica pa tuma data di e nave y procese den informacion exacto di e posicionnan stelar, mocion y otro datanan.
Nan ta splica cu pa investigadonan cu ta mas interesa den uza Gaia pa explora e misterionan di Milky Way, e trabou di Brown ta menos glamoroso. El a bin ta traha como e persona cu ta procesa data den e consorcio desde 2012 y coordina cu tur cos ta bay suave.
Pero e experticio di Brown tabata crucial den exito di e data recogi di Gaia, cual a wordo uza y cita den mas cu 700 documento investigativo. Su esfuerso a yuda crea diferente sistema pa Astronomonan entre otro calcula distanmcianan entre streanan.
Su coleganan ta bisa cu Brown tin un habilidad impresionante pa motiva investigadonan cu lo prefera di traha riba ciencia y tur ta respete.
Ya caba nan ta trahja riba e siguiente publicacion di data, cu probablemente lo ta rond di 2021. E mision a wordo extendi te cu 2020 y Brown ta envolvi den esaki desde 1997.
Gaia, ta abreviacion pa “Global Astrometric Interferometer for Astrophysics” y ta un telescopia espacial di ESA cu a wordo lansa dia 19 di december, 2013. E meta di e sonda aki ta pa traha e mapa tridimensional di mas exacto di henter e Milky Way. Pero tambe na mesun momento revelando e composicion, formacion y evolucion di Galaxia. Gaia lo provee midimento posicional y velocidad radial sin precedente cu e exactitud necesario pa produci un Censo di e biyones di strea cu tin den nos Galaxia.
E data cu a wordo acumula caba y manda pa mundo den luna di october ta mustra cu enbes di forma un Galaxia. E Galaxia den cual nos ta a “merge” cu un otro Galaxia na inicio di su bida, rond di 10 biyon di aña pasa. E evidencia di esaki ta plama tur rond di nos den shelo, pero tabata danki na Gaia y e precision extraordinario di e data cu a mustra nos awor kico tabata scondi den pleno bista tur es tempo. Y esaki ta danki na un team cu a wordo guia pa e Arubiano Anthony Brown.

 

Pa mas informacion bishita e link di e revista NATURE

https://www.nature.com/immersive/d41586-018-07683-5/index.html?fbclid=IwAR1y-kkCemAncnXe_gyPe7h6PQVwf4Bi3n518wlTBn_hKoIxuGxjNIawSV4

 

Spread the love
  • 488
    Shares

Leave a Reply

  • (not be published)