Tur nurse presente tabata bon prepara Pa prome biaha training di evacuacion den camber di operacion

Posted on May 14, 2019, 10:08 pm
4 mins

ORANJESTAD, Aruba

E nursenan di Operatie Kamer (OK) di Dr. Horacio E. Oduber Hospital a participa na un training di evacuacion di candela. E entrenamento a bay hopi bon, door cu cada ken tabata sa e pasonan cu mester a tuma si algo yega na pasa. Na principio a tene cuenta cu diferente aspecto, pero e proceso a cana riba un “flow” basta modera y aceptabel. Entrenamentonan asina ta sumamente necesario y di suma importancia pa asina por tin un idea con e proceso lo cana ora cu surgi un calamidad.

Esaki ta prome biaha cu ta tene un training asina aki riba OK. Hospital su OK ta un luga hopi critico paso por surgi un calamidad net na e momento cu ta bezig operando un pashent. Na e momento ey mester sa hopi lihe unda pa hiba e pashent(nan) y con pa actua paso na momento cu surgi un candela esaki por expande hopi lihe. Tambe paso den camber di operacion tin diferente material cu ta necesario y pues mester sa hopi bon con pa haci uzo di cada seconde na momento cu un calamidad surgi.

Un total di 4 miembro di Hulpverlenersteam (HVT) di HOH  cu ta traha den OK tabata presente y nan tabata super bon prepara den caso di un calamidd. Nan a yuda coordina pa bisa unda pa bay cu e pashent, ki ora mester a cera e zuurstofnan, unda y e tipo di  materialnan cu tin pa uza. E parti pafo unda cu e otro HVTnan tabata yega, mester duna instruccion con pa dirigi hendenan cu ta sali for di OK, cua ruta nan mester coy y unda pa hiba e pashentnan y eventual heridonan nobo.

E plan di evacuacion di OK aki ta nobo, pasobra antes nan tabata hiba tur hende na Departamento di Cuido Intensivo pero awo e pashentnan mas critico tin cu bay Departamento di Emergencia den e asina yama trauma ruimte den caso di un calamidad. Y tin varios otro departamento na unda lo transporta e pashentnan dependiendo nan situacion.

Kiermen e training aki tabata completamente nobo pa nan. Tabata falta un tiki direccion pafo di OK mes, pero esey ta cosnan cu mester drecha pa asina nan ta bon prepara pa cualkier calamidad.

Charles van Heningen, “Operatie Assistent” y miembro di HVT, a duna di conoce di ta contento con cos a bay. E ta asigna p’e division di Operatie Kamer y lo percura pa su grupo di operacion haya mas di e entrenamentonan aki. Tambe lo tuma mas guia cerca Milka Wernet, kende ta hefe di departamento di HVT, cu lo duna tur rekisito extra pa por haci nan trabou di evacuacion mas eficiente.

E training di evacuacion di candela a bay bon cu e personal di Operatie Kamer, asina Milka Wernet, Manager Beveiliging, a duna di conoce. E coordinacion a bay hopi bon, tin cosnan cu mester drecha pero ta cosnan chikito pues cosnan interno. Tambe ta cosnan cu tin di haber por ehempel cu material, e team di HVT y e personal di siguridad.


Spread the love

Leave a Reply

  • (not be published)