Sra. Hellen van der Wal unanimamente elegi como presidente di Directiva di DCNA

Posted on April 09, 2019, 6:21 pm
4 mins

ORANJESTAD, Aruba

Directiva di Dutch Caribbean Nature Alliance (DCNA) orguyosamente ta anuncia nombramento recien di sra. Hellen van der Wal como su presidente nobo. DCNA ta un fundacion non-profit cu contactonan regional di colaboracion. E tey pa sostene y asisti organisacionnan di naturalesa riba e seis islanan Hulandes den Caribe. DCNA tin como meta pa salvaguardia biodiversidad y promove maneho duradero di recursonan natural tanto riba tera como den awa pa bienestar di presente y futuro generacionnan.

DCNA ta traha cu organisacionnan dedica na conservacion di naturalesa na Aruba, Boneiro, Corsou, Saba, Statia y St. Maarten. Door di crea un voz uni y door di comparti recursonan, abilidadnan y experiencia, DCNA por reenforsa e contactonan regional di colaboracion y sostene iniciativanan di ful Caribe Hulandes. DCNA tambe tin como meta pa sostene e parkenan den e region pa cu un futuro duradero di fondo.

Un presidente nobo semper tin idea nobo. Ta importante pa e seis islanan mara hunto aunke tin ora esaki ta un reto pa motivo di e cambio constitucional den Reino y e posicion special di e islanan BES” sra. van der Wal ta splica. Ademas sra. van der Wal kier reenforsa e funcion di e aliansacu ta e motivo pa cua a establece DCNA.

Hellen A. van der Wal a nace na Hulanda y a lanta na Aruba. E cunucu di Aruba y e lama Caribense tabata su cura pa core, hunga y landa aden pa hopi aña. Despues di finalisa enseñansa avansa na Aruba ela bai studia periodismo y ley na Hulanda. Na 1990 ela regresa Aruba, trahando den diferente funcion na Departamento di Husticia.

Na 2018 su carera na gobierno a yega na un fin ora cu ela haya nombramento como miembro di Comicion pa Supervicion Financiero (CFT Aruba) pa Aruba. E mesun aña ela drenta directiva di Fundacion Parke Nacional Aruba. For di 2018 e ta representa Fundacion Parke Nacional Aruba den e directiva general di DCNA. Na 2019 sra. van der Wal a drenta e Comite di Supervicion di Fundacion Parke Nacional Aruba. Entrante 3 april 2019, a elegi sra. Hellen van der Wal unanimamente como presidente di directiva di DCNA.

Hellen van der Wal ta un persona hopi activo den comunidad. E tabata un di e fundadornan di e fundacion Telefon pa Hubentud Aruba y tabata elegi como Representante di Caribe den e Comicion Consehero di NGO pa continua cu e estudio general di Nacionnan Uni tocante Violencia contra Mucha. Na 2005 ela establece e fundacion Comunidad & Criminalidad, pa promove investigacion scientifico y desaroyo di material educativo y projecto riba tereno di seguridad y prevencion.

Relaciona cu su interes y carera anterior e kier pone extra atencion den participacion di mucha den conservacion di naturalesa riba e seis islanan. Otro tareanan cu sra. van der Wal tin riba su funcion como presidente ta pa busca un director nobo, mehora maneho basa riba tanto nesesidad como prioridad cu e parkenan mes ta stipula, desaroya strategianan concreto y conceptonan di programa.


Presidente nobo di directiva di DCNA sra. van der Wal (na man robes) hunto cu presidente saliente di directiva Leendert van Driel (na man drechi). Mr. van Driel tabata hopi valioso como miembro di directiva pa mas cu dies aña y lo mantene un puesto como miembro di directiva di DCNA.


Spread the love
  • 9
    Shares

Leave a Reply

  • (not be published)