Sekretario Di Estado Knops A Traspasá Wafnan Renobá Na Gezaghebber Rijna

Posted on January 10, 2019, 3:01 pm
6 mins

KRALENDIJK, Bonaire   

Riba 9 di yanüari sekretario di estado Raymond Knops a traspasá e wafnan di Playa renobá na gezaghebber Rijna di Entidat Públiko Boneiru. Riba enkargo di Ministerio di Infrastruktura i Maneho di Awa aña pasá a renobá e wafnan rigurosamente i nan por dura hopi aña atrobe.

Pa motibu di daño di tormenta i mantenshon atrasá e wafnan tabata den un estado hopi malu i de fakto nan no tabata adekuá mas pa mara barku grandi na nan. Despues ku na aña 2015 e fondo pa  renobashon a bini disponibel a instituí un ‘Grupo di Guia Haf di Laman’ (Stuurgroep Zeehavens) bou di presidensia di gezaghebber Rijna, konsistiendo di diferente diputado i direktor di Entidat Públiko Boneiru huntu ku e direktor di Asuntunan Marítimo di Ministerio di Infrastruktura i Maneho di Awa, Órgano di Maneho di Awa di Reino

(Rijkswaterstaat) i Port of Amsterdam International komo konsehero i lider di proyekto.

‘E Grupo di Guia tabata un idea di oro’, segun sr Rijna. ‘Ta trata di un proseso bastante kompliká, kaminda for di Boneiru i Hulanda mester a traha huntu. Dor di e vídeo-konferensianan ku nos tabata tene komo Grupo di Guia a surgi mihó komprenshon pa otro su situashon i nos a traha duru i en ekstenso huntu na organisashon di e renobashon. P’esei ta ku gran plaser mi a tuma e wafnan over for di sekretario di estado pa uso atrobe. Esaki ta duna gana pa hasi mas i kisas por ekstendé Waf di Sùit ku e mesun partidonan.’

Loke ta spesial na renobashon di Waf di Sùit ta ku a solushoná e manera ku e konstrukshon di betòn i e postenan di heru ku ta karga e waf a keda afektá, di un sistema hopi inovativo. Esaki a sosodé dor di apliká bara di karbon i fibra di glas pa remplasá e heru di betòn. E bentaha grandi ta ku e materialnan aki no ta frusa. Aparte di e renobashon a pone un poste di mara barku (Dolphin) grandi tambe, di manera ku barkunan grandi por mara mas mihó i mas seif.

No solamente a renobá Waf di Mei Mei, pero a adapt’é tambe di manera ku e barkunan di kònteiner di e kompania Don Andres por baha nan kònteinernan einan na un manera mas mihó i mas seif.

E kompania Knol di Akkrum, Hulanda, a hasi e trabou. E kompania aki, pa medio di RMD, su partner boneriano, a sòru ku trahadónan lokal a ehekutá masha hopi trabou. Un otro partner, esta e kompania SealteQ a bini ku e método inovativo ku bara di karbon i a ehekutá esaki tambe.

Durante un paseo ku e boto ku bòm di glas e konstruktornan a mira ku tabatin un kantidat grandi di shushi den fondo di laman den e awa bunita rónt di nos haf i na Klein Bonaire tambe. Spesialmente hopi tayer di outo. Pa Jurgen Jongenelen di Arcadis, ku durante 6 luna tabata na Boneiru komo ehekutivo di supervishon di e proyekto, esaki tabata motibu pa konbertí e asombro i iritashon tokante e shushedat aki den akshon. Huntu ku Stinapa el a traha riba e idea pa hasi algu na e forma apart di polushon di suela aki i el a hasi’é un plan di akshon. Den e wikènt di 19 i 20 di yanüari, huntu ku un kantidat grandi di boluntario (sambuyadó), Stinapa ta bai atendé ku e polushon aki. Stinapa lo buska i transportá e shushi ku nan rekogé di forma gratuito. E kompanianan ku tabata enbolbí ku e konstrukshon, Knol GWW i su partnernan SealteQ,  Aquatech, RMD, Arcadis i Port of Amsterdam International a pone e suma huntu ku ta nesesario pa e akshon di limpiesa.

Ayera, na nòmber di e kompanianan aki, direktor di Port of Amsterdam a entregá un chèk di $ 11.000,– na Arjen de Wolff, direktor di Stinapa. ‘Nos ta sumamente kontentu ku e inisiativa aki di e kompanianan di konstrukshon’, segun de Wolff. ‘Pa nos tambe ya pa años kaba esaki ta un fuente di iritashon i nos ta kontentu ku awor nos por atendé kuné den e aña di selebrashon di hubileo di Stinapa.  Mi ta sigur ku esaki lo ta na agrado di hopi sambuyadó i loke ta mas importante ainda ta ku nos bunita parke supmarino ta bira hopi mas mihó atrobe’.

                  

Spread the love
  • 8
    Shares

Leave a Reply

  • (not be published)