REKLUTÁ APODERASHON (VÒLMAGT) PA VOTA TA KASTIGABEL PA LEI

Posted on March 14, 2019, 11:09 am
3 mins

KRALENDIJK, Bonaire

Durante  elekshon di 20 di mart awor, votadónan por vota pa medio di apoderashon. Hende ku tin derecho di vota i ku no por vota 20 di mart pa motibu di por ehèmpel trabou, malesa òf vakashon, por duna un otro hende un apoderashon. Ta kastigabel pa lei pa aserká votadónan personalmente pa pidi nan duna un apoderashon.

Segun lei elektoral reklutashon di voto ta nifiká aserká votadónan kontinuamente i personalmente pa logra ku nan ta duna un apoderashon. Segun lei elektoral esaki ta kastigabel. Un hende no tin mag di kumpra voto tampoko serka un otro hende dunando e un regalo, òf primintiendo e hende akí algu, no ta permití tampoko pa obligá un hende pa e duna un apoderashon. Segun lei elektoral i Kódigo Penal esaki ta kastigabel. T’asina ku votadó mes mester disidí si e ke vota pa medio di apoderashon i ken e ke apoderá pa hasi esei. Reklutashon di voto pa medio di apoderashon ta en pugna ku e punto di salida aki. Den kaso ku tin sospecho ku ta reklutá apoderashon, mester informá Ministerio Públiko di esaki.

Vota pa medio di apoderashon ta un posibilidat pa votadónan ku tin gana di vota, pero físikamente no por bai vota nan mes. Pa medio di un apoderashon basá riba un akuerdo entre dos hende, e votadónan aki tin oportunidat pa laga un apoderado vota pa nan. Ta habitante di Boneiru so ku a risibí un karchi di vota por bira apoderado. Parti patras di e karchi di vota por yena nòmber di e apoderado. Un hende ku ta  den kondishon pa bai vota, tin mag di tin un máksimo di dos voto via apoderashon ora e bai vota.

Ta posibel tambe pa duna apoderashon por eskrito. Pa mas tardá 15 di mart 2019 Departamentu di Asuntunan Sivil mester a risibí e petishonnan por eskrito. Pa esaki e votadó por ‘download’ un formulario via e wèpsait www.boneirutavota.com. Konseho Supremo Elektoral no ta atendé ku petishon por eskrito ku no ta kumpli ku eksigensia manera stipulá den lei elektoral. 

Pa mas informashon tokante vota ku apoderashon wak riba nos wèpsait www.boneirutavota.com.

Spread the love
  • 1
    Share

Leave a Reply

  • (not be published)