Prome Minister Trinidad & Tobago: Tur hende cu drenta via di lancha ilegal ta wordo deporta mesora

Posted on June 05, 2019, 2:03 pm
5 mins

Trinidad and Tobago , Port of Spain

Prome Minister di Trinidad & Tobago, dr Keith Rowley den un discurso nacional relaciona cu e fluho di migrantenan Venezolano den e pais ultimo tempo, a enfatisa cu e prome responsabilidad di gobierno di Trinidad & Tobago, ta di percura pa proteha interes di tur ciudadano mas cu tur cos.

El a mustra cu tur loke nan ta convivi cu ciudadanonan Venezolano y nan situacion den nan propio pais na e momentonan aki, e prome obligacion di gobierno di Trinidad & Tobago, ta keda interes di hendenan di su pais.

Premier Roweley a mustra cu ora cu haci un comparacion entre e dos paisnan y tira un bista riba mapa di e dos paisnan,  ya caba eynan por haya un impresion cuanto Trinidad lo por yuda y te na unda e ayudo aki por yega, ya cu mientras cu Trinidad & Tobago ta un pais di 1.3 miyon habitante, Venezuela ta un pais cu tin un populacion di 33 miyon hende.

E problemanan actual di Venezuela, ta di y pa Venezolanonan y Trinidad & Tobago ta un pais humanitario, cu ta preocupa pa otronan y ta dispuesto pa brinda ayudon pero na mes momento e ayudo aki mester ta limita ya cu un isla chikito manera Trinidad, simplemente no por ta e solucion pa miyones of miles di ciudadanonan venezolano cu ta bandonando nan pais.

E prome minister  di e isla tambe a mustra cu tin hopi agencianan internacional cu ta ehecutando nan propio agendanan,  ta sirbi nan propio interes contra di interesnan di Trinidad & Tobago pero su gobierno lo no permiti ningun di e instancianan aki, transforma e isla den un tipo di campo di refugiado  pa asina alivia e problema grandi di Venezuela.

Rowley a mustra bon cla cu su pais tin cu limita su mes di e influencia di e desaroyonan negativo di Venezuela.

Trinidad & Tobago a y ta tene su portanan habri pa Venezolanonan cu kier bin e pais y kendenan por keda 90 dia manera e ley  ta prescribi pero Rowley a señala cu lo yega e momento cu e volumen di hendenan for di Venezuela y nan presencia riba e isla, lo bay afecta e calidad di bida di ciudadanonan di Trinidad & Tobago y ta algo cu gobiierno di e pais tin cu atende cune pa evita problemanan.

Esaki ta encera cu tur departamento tin cu percura pa un registracion debido y rapido pa asina tin control tiba cuantoo hende a drenta y cuanto a keda, kende nan ta y na unda nan ta kedando, ya cu mester proteha interes di e pais.

Sinembargo loke ta hungando un rol sumamente importante y cu ta hopi delicado segun Premier Rowley, ta mientras cu su pais ta keda hospitalario y a mantene su portanan habri, ta existi e elemento criminal cu tambe lo bay trata di probecha di e situacion aki y cu por wordo importa cu e hendenan aki.

Ta sumamente necesario pa tin un control estricto, pa sa kende ta drenta y con nan ta drenta, hendenan cu kier drenta e pais den otro forma cu e sistema normal y legal, cu ta creando un alerta formal pa control riba costa na tur momento.

Premier Rowley a manda un mensahe cla pa tur esunnan cu kier drenta e pais, bisando cu si autoridadnan gra cualkier persona cu trata di drenta Trinidad & Tobago via un sistema cu no ta esunnan normal, esta via costa cu lancahanan, nan lo wordo deteni y lo wordo deporta inmediatamente.

Gobierno lo no permiti cu ta intercepta lanchanan cu cantidad di ilegalnan tratando di drenta e isla, anto despues ta laga e hendenan aki liber den comunidad y den forma contundente a bisa cu su gobierno lo no permiti esaki tuma luga.

Finalmente Premier Rowley a manda un mensahe pa esunnan cu ta haci negoshi den traficacion di hende, cu nan lo no haya entreda na e isla aki y cu si nan wordo deteni, lo sufri consecuencianan serio segun leynan di e pais

Spread the love

Leave a Reply

  • (not be published)