Prome Minister Evelyn Wever-Croes: Un siglo di amor y experencia brinda na tur cu ta rond di dje Señora Rie Van Gaalen A Cumpli E Bunita Edad Di 100 Aña

Posted on January 10, 2019, 3:34 pm
2 mins

ORANJESTAD, Aruba  

Den un atardi masha ameno, Prome Minister Evelyn Wever-Croes a celebra hunto cu famia y conocirnan, e cumpleaño di señora Rie van Gaalen. Señora van Gaalen a cumpli e bunita edad di 100 aña. Un siglo di amor y experencia brinda na tur cu ta rond di dje. Esaki sigur ta un bendicion grandi.

Hopi di nos na Aruba ta corda Señora Rie como e famoso kapster kende a atende hopi hende aki na Aruba y na Hulanda.

Naci na Hulanda dia 8 di januari 1919, net despues di e Prome Guera Mundial. E ta bin di un famia grandi di 12 ruman. No tawata straño cu señora Rie tawata kapster di profesion. Esaki tawata un tradicion di su famia. Su padushi a cuida e barba di Rey Willem 3 (?). Señora Rie mes tambe tawata tin e honor di a corta cabey di Reina Juliana y e Prinsesnan Beatrix, Irene y Magriet.

Despues cu señora Rie a casa cu Kornelis Johannes (Kees) van Gaalen na aña 1946, nan a muda pa Aruba. Aki señora Rie a establece su negoshi di corta y cuida cabey na unda cu el a haya cliente di tur rond Aruba. El a siña hopi mucha muher e profesion aki tambe.

Aunke cu su negoshi tawata bay bon y tawata gusta biba na Aruba, Señora Rie mester a bay bek Hulanda na unda el a sigui cu su negoshi. Cu su 80 aña, Señora Rie a regresa Aruba y awe, 20 aña despues, e ta cumpli 100 aña na su dushi Aruba.

Prome Minister Evelyn Wever-Croes tawata tin e honor di tawata presente na e celebracion aki y ta gradici Señora Rie y famia pa e oportunidad pa comparti un ocacion asina bunita na unda un dama cu a inverti asina hopi den nos hendenan na Aruba, a cumpli e bunita edad di 100 aña. Pabien Señora Rie.

  

Spread the love
  • 14
    Shares

Leave a Reply

  • (not be published)