Prome Minister Evelyn Wever-Croes: Gobierno Di Aruba Tin Tur Atencion Riba E Situacion Di Impacto Di Crisis Migratorio Di Venezuela

Posted on June 11, 2019, 4:25 pm
4 mins

ORANJESTAD, Aruba      

Combersacionnan ta andando pa yega na un protocol entre cuerpo policial y Marina Real

Pa loke ta trata e situacion na Venezuela mes, Prome Minister durante conferencia di prensa semanal di Gobierno di Aruba dialuna mainta, ta indica cu esaki no ta un crisis di Venezuela so mas, tampoco un crisis di region so mas, sino un crisis mundial. Por lo tanto, e comunidad mundial mester lanta y asumi e responsabilidad.

“Nos na Aruba ta haciendo nos parti den e reto inmensamente grandi aki. Y awoki ta tempo pa otronan tambe haci nan parti. Na Aruba, apesar di tur esfuerso cu ta wordo haci pa intercepta y stop botonan ilegal drenta nos pais, ainda nan ta sigui drenta”.

Prome Minister a indica cu apesar di tur esfuerso cu a wordo haci den maneho di Gobierno ainda no ta suficiente. Esaki ta mustra tambe e magnitud di e problematica aki. Gobierno ta intensivando e esfuersonan. Awo lo cuminsa combersacionnan cu Marina Real tambe pa asina yega na un protocol entre cuerpo policial y Marina Real pa asina cera nos fronteranan completamente pa e actonan ilegal aki cu ta tumando luga.

“Esaki no ta locual nos kier y tin mester na Aruba. Aruba awor aki mester di trankilidad y siguridad”.

Durante su bishita na Hulanda, Prome Minister a reuni cu Premier Rutte, Secretario di Estado Raymond Knops, Eerste y Tweede Kamer riba e tema di Venezuela. Ta importante, segun Prome Minister pa nan tende for di dje mes den nomber di Aruba, kico e impacto di e crisis di Venezuela tin riba Aruba, na unda cu el a haci un peticion pa nan tene cuenta cu esaki.

Hulanda a informa cu lo pone 23.8 miyon Euro disponibel e aña aki pa atende cu e impacto di e crisis di Venezuela riba nos pais. Gobierno di Aruba ta den e proceso pa entrega e lista di loke cu tin mester pa haci Aruba mas sigur. Entre otro mas radar, mas proteccion y vigilancia di nos costanan, mas botonan pa controla nos costanan mas miho, mas asistencia na e procesonan di peticionnan di asilo.

Prome Minister a enfatisa cu e 23.8 miyon Euro aki, Aruba lo no ricibi como placa. Hulanda ta cuantifica den kico nan ta bay yuda Aruba y Corsou cu e placa disponibel aki. P’esey Gobierno ta trahando riba un lista mas structural di locual mas nos tin mester pa inclui den e lista aki pa Hulanda yuda nos cu ne.

“Venezuela ta pasando momentonan dificil cu ta ocasiona cu Aruba ta pasando den momentonan tenso. Gobierno di Aruba ta prepara y ta trahando riba tur area pa mantene cabes riba awa y mantene e crisis y su impacto bou di control. Pero tambe ta importante pa nos conta riba tur ciudadano di pais Aruba. Mi ta pidi e comunidad di Aruba pa tin mas pasenshi mientras nos ta mira e miho manera pa atende cu esaki. Na e momentonan aki nos tin mester trankilidad na Aruba. Gobierno tin tur atencion riba e tema aki”, Prome Minister Evelyn Wever-Croes a duna di conoce.

              

Spread the love

Leave a Reply

  • (not be published)