Partico MEP: Prome Minister Evelyn Wever-croes Ta Cumpli 10 Aña Den Politica

Posted on May 13, 2019, 10:21 pm
3 mins

ORANJESTAD, Aruba    

Dialuna 13 di mei, Prome Minister Evelyn Wever Croes a cumpli 10 aña den politica. Un trayectoria cu a exigi hopi trabou duro y sacrificio sinembargo, pa e mandatario principal di nos pais, e amor y tempo cu e ta pone den politica ta cu un solo meta, pa pone e ser humano central creando oportunidad pa tur ciudadano di nos pais sinti e prosperidad y bienestar cu nos pais ta brinda nos tur.

ESTUDIO Y CARERA

Prome Minister Evelyn Wever Croes a studia ley na Universidad di Antias Hulandes na 1985 pa 1986. Despues cu el a obtene su titulo di ‘kandidaats’, el a bay studia na Hulanda na unda el a studia ley di belasting na Universidad di Leiden y a termina su estudio na 1989. Na su regreso na Aruba, Prome Minister a traha na SIAD for di 1989 te cu 2003, na unda cu el a bira hefe di departameno na aña 2003. Despues el a traha na e bufete di abogado Croes, Wever & Tchong te cu 2010 prome como consehero fiscal y desde 2008 como abogado.

POLITICA

Na aña 2009 Prome Minister Evelyn Wever Croes a cambia su carera di consehero fiscal y abogacia, pa politica. Den eleccion 2009 Prome Minister a saca su mes, y a drenta Parlamento. Na aña 2011, momento cu sr. Nelson Oduber a tuma su retiro di politica, Prome Minister a postula su mes pa eleccion di lider di partido MEP y a gana e eleccion, Prome Minister ta lidera e prestigioso partido MEP desde 2011 guiando un ekipo di candidatonan determina pa trece un cambio y haci un diferencia positivo den bida di tur ciudadano di Aruba.

PARLAMENTO

Den Parlamento Prome Minister Evelyn Wever Croes a distingui su mes pa e nivel di debatenan, y especialmente e contenido di e debatenan, tratando di trece cambionan den leynan caminda cu ta necesario.

PROME MINISTER DI ARUBA

Den e eleccion na september 2017, pueblo a duna un veredicto cla di rechaso na corupcion y e deseo di tin un gobierno integro y transparente y a vota pa un coalicion. Prome Minister a fungi como formador di un Gobierno Nobo. Un Gobierno basa riba un programa di gobernacion solido y transparente cu a wordo firma dia 1 di november 2017, cu e meta pa pone e ser humano central. Dia 17 di november, Evelyn Wever Croes a huramenta y a marca historia di nos pais como e prome Prome Minister femenino di nos pais. Y esaki tawata e comienso di Gabinete Wever-Croes.

META DEN POLITICA

“Politica ta exigi trabou duro y hopi sacrificio, pero ami ta haci’e cu hopi amor, satisfaccion y compromiso, pasobra asina realmente mi por yuda esnan cu tin mas mester di dje. Mi meta den politica? Crea oportunidad pa tur hende, especialmente hende muher y hobennan, por desaroya y duna di nan parti pa hiba nos pais riba e caminda di bienestar pa un y tur”.


Spread the love

Leave a Reply

  • (not be published)