Parlamentario Sue-Ann Ras (MEP): “SKOA mester traha mas transparente y entrega relato anual pendiente”

Posted on August 25, 2018, 4:24 pm
5 mins

ORANJESTAD, Aruba

 E periodo di vakantie a pasa y ya prome cu esey caba, hopi di e maestronan tabata den klas ta haciendo varios trabou, specialmente preparando nan klas pa crea un ambiente atractivo, educativo y agradabel pa e muchanan. Segun ex docente, parlamentario Sue-Ann Ras, esaki sigur ta di aplaudi y aprecia, mirando cu mayoria maestro ta saca tur e gastonan for di nan propio saco y ta hacie cu masha dedicacion pa nan trabou. “Loke mi a ripara durante mi bishita cerca algun amistad di scol ta, cu e maneho di cada directiva ta completamente diferente, specialmente di e fundacionnan di scol”, Ras a sigui bisa. Tin algun scol cu ta cay bou di DPS, unda cu e maestro ta haya hasta un suma chikito pa cabes di alumno, unda ta permiti e maestro un espacio extra pa haci mas pa su aña escolar, sea ta pa su lokaal of material educativo pa su lokaal. Sinembargo e situacion cu e scolnan di SKOA ta completamente diferente, ya cu ni relato anual e fundacion aki ta entregando, p’e suma miyonario di placa cu e ta haya anualmente di gobierno.

MANTENCION

Segun Ras, e ta haya cu ta condenabel, cu gobierno mester percura pa cada mantencion chikito di e scolnan, mientras cu tin 83 scol di cual alrededor di mita, ta cay bou di SKOA. Durante e añanan atras, e ex minister di enseñansa a indica cu el a aloca alrededor di 1 miyon florin den presupuesto di SKOA, pa loke ta trata mantencion di su scolnan. Pero realidad ta diferente, ya cu cualkier cos chikito cu ta encera mantencion, ta gobierno mester drecha. “Esaki sigur no ta aceptabel, paso si SKOA ta haya placa pa esaki, ta pasobra e mester tin un plan di maneho di mantencion p’e scolnan anualmente y asina structuralmente brinda mantencion, pa evita cu e scolnan ta cay den e estado di mal mantencion, manera ta e caso cu hopi scol”. Mayoria scol mes tin biaha ta percura p’e mantencionnan aki for di nan ‘pot’ y mas cu claro, cu mantencion grandi ta imposibel pa un scol carga. Gobierno ta responsabel p’e mantencionnan grandi, pero no pa drecha bentana, porta, etc etc. esey ta SKOA su tarea y responsabilidad. 

TRANSPARENCIA 

Mi no por kere cu ta for di 2015 ta e ultimo relato anual cu SKOA a entrega y gobierno na 2017 a duna casi 70 miyon florin y na 2018 a duna casi 75 miyon florin y e unico dos hustificacion cu nos ta wak den e presupuesto di SKOA ta: subsidio ‘exploitatie kosten’ y subsidio ‘salaris kosten’, mientras cu e scolnan di DPS, bo ta haya e presupuesto completamente elabora”, Ras a sigui bisa. “Si nos ta papia di bon gobernacion y transparencia, nos mester cuminsa na nos mes y con ami como Parlamentario por eherce mi funcion segun ley, unda mi tin cu duna aprobacion na un fundacion manera SKOA, cu ta haya casi 75 miyon florin y no tin un relato anual kico ta haci cu e placa?”, Ras ta cuestiona. 

SCHOOLGELD

Awor, si analisa cu SKOA ta haya alrededor di 10 mil inscripcion di alumno anualmente (scol preparatorio, basico, special y secundario) y ta cobra pa cada alumno Awg. 175,- esaki ta yega na un suma di riba 1.7 miyon florin. “Pregunta ta e ora, kico ta haci cu e suma aki, mirando cu tur gasto grandi, gobierno ta paga toch?”, Ras ta sigui cuestiona.  P’esey ta importante segun Ras, pa haya e relatonan anual aki, ya cu di e forma aki por controla tur e puntonan aki y sigur por traha riba un miho calidad y contenido di enseñansa pa nos muchanan. Ironia ta, cu cada scol si ta entrega nan presupuesto na SKOA y ta un exigencia tambe, mescos cu e hustificacion di bo ‘taakuren’, pero nan mes no ta haci esaki na gobierno.  

 

Spread the love
  • 6
    Shares

Leave a Reply

  • (not be published)