Parlamentario Sue-Ann Ras (MEP): “Debate den enseñansa tin hopi beneficio y ta genera participacion activo”

Posted on June 10, 2019, 1:43 pm
3 mins

ORANJESTAD, Aruba

Recientemente Parlamentario Sue-Ann Ras hunto cu su colega Sharlene Starke, tabata invita pa fungi como hurado pa un debate di diferente klas di H4 na Colegio San Nicolas. Jufr. Richeilla Wijngaarde a sa di prepara su alumnonan debidamente riba e tecnicanan di debate y cada alumno mester a prepara pa 13 topico, cu ta relaciona cu diferente aspecto den comunidad. Debate ta un bon forma di aumenta e beneficionan di participacion den klas y e trabou den ekipo y sigur ta genera un participacion activo y ta siña e alumnonan formula, argumenta y expresa nan ideanan.

TOPICO ACTUAL

E topico di igualdad di genero den trabou, transporte publico gratis pa tur hende y paga mas na impuesto pa yuda e menos afortunanan, tabata bon discuti y a bin cu varios ponencia bon alcaso y cu ehempel uzando investigacion. “Semper ta un placer pa mi, pa ta bek den klas cu e alumnonan. Realmente uno ta intercambia y experiencia hopi momento unico y profundo. Un debate semper ta brinda oportunidad na nos hobennan, pa siña defende nan punto di bista, comunica cu otro riba un topico specifico y scucha otro prome cu reacciona, treciendo asina un ambiente saludabel di discusion, sin falta otro respet” Ras a expresa.

BENEFICIO DI DEBATE

Debati, sa argumenta idea y ta persuasivo cu e mensahe cu uno kier transmiti, ta e retonan cu tur studiante lo enfrenta den e mundo profesional y ta di vital importancia pa siña, pa logra nan metanan den bida. Aunke debate no ta e herment educativo mas popular of visibel den e metodonan di enseñansa, Ras mes tabata uno cu tabata uza esaki hopi den klas. “Mi ta aplaudi e iniciativa aki di jufr. Richeilla Wijngaarde den su lesnan di Individu & Samenleving, unda cu cada grupo tabata debidamente prepara y entusiasma pa participa na nan debate. Incluso e tempo tabata cortico segun nan y esey ta duna indicacion, cu nan ta disfruta y ta hopi activo durante e les aki,” Ras a amplia.

Finalmente Ras ta encurasha y aplaudi tur docente cu ta haci uzo di tipo di actividad asina, pa desaroya e habilidadnan comunicativo, pensamento y rasonamento di nos mucha- y hobennan.  “Debate ta siña nos hobenan pa pensa y transmiti argumento di forma persuasivo. Nos mester percura pa crea un ambiente unda por siña nan e poder di palabra, idioma y forma di expresa idea eficientemente,” Ras a finalisa bisando.


Spread the love

Leave a Reply

  • (not be published)