Parlamentario Hendrik Tevreden di MEP: Riba tema di Cannabis: “Mester distingui e bon for di e malo!”

Posted on December 16, 2018, 10:58 pm
3 mins

ORANJESTAD, Aruba

Manera ya caba ta conoci, diabierna ultimo durante tratamento di presupuesto 2019, a surgi un discusion riba e tema di cannabis y e legalisacion di esaki. Pa Parlamentario Hendrik Tevreden di partido MEP, e punto ta hopi cla: ta sostene e parti medicinal, pero no lo permiti sin mas pa legalisa cannabis di forma recreacional. Dialuna ta programa pa sigui cu e reunion, unda Minister Dangui Oduber encarga cu salubridad publico mester ta presente.

Parlamentario Tevreden ta un persona cu ta bin for di e area di trabou cu netamente ta encarga pa yuda hende sali for di droga y adiccion. Riba veld di trabou, el a mira y experencia pa su mes cuanto persona y nan famia ta sufri pa motibo di droga y e ta conoci cu hopi, pa no bisa tur di e personanan cu ta adicto na droga, na un momento of otro a haci uzo di cannabis, of crioyamente yama marihuana. Por yame ‘soft drug’, pero suavisando e palabra no ta haci cu e no ta un droga mas. Con cu bir’e, e ta keda un droga cu por habri caminda pa otronan cu ta mas pisa mescos cu alcohol tambe ta.

“Pa mi persona no tin discusion pa hiba riba e beneficionan medicinal. Tin basta estudio haci y no mester bay inventa e wiel di nobo. E ta prueba cu cannabis por yuda den hopi malesa. Cu e ta cura malesa ta un pregunta ainda”, Parlamentario Tevreden a expresa. E ta sigui splica cu no ta paso e tin beneficio medicinal nifica cu mester legalisa di forma recreacional. “Cocaina tambe tin beneficionan medicinal, nos ta bay legalis’e di forma recreacional tambe? Laga nos keda serio cu e argumentonan y distingui e bon for di e malo!”

Pa loke ta e beneficionan medicinal y tambe industrial, e porta di discusion ta keda habri pa sr. Tevreden. “Si otro parlamentario kier pusha su agenda pa legalisa di forma recreacional, ta su libertad pero manera mi a bisa den sala di Parlamento, e fli ey no ta bay subi ya cu mi mes lo corta e rabo. Aruba tin hopi otro cos pa atende cu ne y no solamente e agenda pa legalisa marihuana”, sr. Tevreden a expresa na final.

 

Spread the love
  • 233
    Shares

Leave a Reply

  • (not be published)