Parlamentario Endy Croes: Lo traha riba un Ley pa Deporte Companianan Estatal y Gobierno mester bira e modelo ehemplo

Posted on January 11, 2019, 12:08 am
3 mins

ORANJESTAD, Aruba        

Parlamentario Endy Croes a splica den su ultimo conferencia di prensa cu cada Parlamentario di Fraccion di MEP a stipula 3 meta di prioridad cu lo bira tambe locual cada parlamentario – banda di tur otro trabao – lo trata na cumpli cu esakinan. Un di e 3 puntonan di prioridad di Parlamentario Endy Croes ta pa lucha pa por bin cu un Ley di deporte. Segun Croes Aruba ta kedando atras den region como cu den tempo moderno y cu tecnologianan moderno un atleta mester prepara su mes debidamente pa por representa su Pais.

Den e caso di Aruba, Gobierno conoce un maneho basa riba un  Ley esta BVVD “Buitengewone Vrijstelling Van Dienst”. Mediante e Ley aki atletanan emplea den gobierno of companianan estatal ta ricibi dianan liber cu pago momento cu nan biaha pa representa nan Pais. Esaki ta significa tambe cu un atleta  despues cu e traha 8 ora pa dia mester acudi na entrenamento pa asina train entre 3 cu 4 ora minimo 4 ves pa siman dado caso bo kier competi. Segun Croes esaki ta inhumano y algo mester wordo haci. Nunca nos no lo hisa nos nivel na nivel den region si nos no actua diferente. Ta cuestion di inverti den nos atletanan na un mihor forma y segun Croes esaki mester ta e inicio y gobierno hunto cu tur compania di utilidad y of sui generis mester bira e modelo.

Parlamentario Croes ta consciente tambe cu esaki mester wordo controla di tal indole cu e Ley lo basa su mes riba campeonatonan reconoci pa Federacionnan y Confederacionnan Internacional y no mas un knockout of competencianan cu no ta cay bou di rekisitonan cu lo wordo estableci. Deseo ta pa cuminsa cu atletanan cu ta traha den gobierno y companianan estatal y sui generis y poco poco drenta e sector comercial. Un atleta mester por haya minimo 6 siman promer cu e fecha di competencia 3 pa 4 dia pa siman por lo menos mitar dia liber cu pago y tampoco mester wordo kita di su vakantie pa e por train y prepara su mes.

Esaki ta e inicio y Croes sea kier bin cu un Ley nobo of sea adapta e Ley existente AB 1998 no GT 22 Bijzondere vrijstelling van dienst, incorporando un artikel nobo y asina inicia e rumbo nobo den deporte beneficiando nos atletanan y brindando nan e espacio pa prepara nan mes debidamente pa por competi contra paisnan grandi. Esaki lo mester conta tambe pa manager of coach di seleccion of esnan cu ta bay representa Aruba.

Croes ta termina bisando cu un caminda nos mester cuminsa y den 2019 lo traha duro pa por concretisa e promer pasonan firme pa nos atletanan.   

          

Spread the love
  • 13
    Shares

Leave a Reply

  • (not be published)