Parlamentario Edgard Vrolijk (MEP): Un soño cu a ser poni den un plan y awo ta mas cerca di bira realidad

Posted on November 30, 2018, 5:32 pm
4 mins

ORANJESTAD, Aruba

Awe 30 november 2018 ta un dia hopi importante pa Santa Cruz y principalmente pa Fundacion Centro di Bario Santa Cruz bou liderazgo di sr. Michel Lopez, cu riba su perseverancia a logra pa e fundacion haya un tereno cu lo mester sirbi e meta pa Santa Cruz tin su propio Centro di Bario Santa Cruz, uno cu lo mester bira multifuncional. E centro aki lo mester brinda scolnan oportunidad di por haci uso di e facilidad, e lo mester sirbi e pueblo pa por yuda stimula y yuda esnan cu pa un of otro motibo no por a sigui nan carera escolar cu aki nan por hacie y alaves e mester por brinda e posibilidad na e pueblo di por cana, core y muchanan por haci deporte recreacional riba esaki.

Un soño di nos hubentud cu nos a cana cune y sigur nunca nos a bandona. Un proyecto cu nos tin algun aña andando y hasta cu mala fe kier a pasa e grupo di amigonan aki un fastball, pero nos ta traha cu humildad y bondad, y tur cos haci di buena fe ningun hende no por kit’e di bo. Mi persona hunto cu sr. Michel Lopez ta hobennan di Santa Cruz y a haci deporte henter nan bida den Santa Cruz y a pone e soño den un plan. Un plan cu no tin color politico, pero un plan pa un proyecto cu lo mester sirbi comunidad y ta netamente pa e motibo aki mi persona a scoge pa no ta miembro di e fundacion pero keda tras di cortina p’asina e proyecto noble aki por cana su caminda.

Mi ta hopi orguyoso di mi bon amigo y mescos cu ruman sr. Michel Lopez pa a sigui cu e proyecto y su perseverancia pa por haci esaki realidad. Sigur e tin e mesun pasion cu su difunto tata Maikel Lopez cu a haci hopi pa SV Estrella y awor nos lo sostene Michel Lopez den e proyecto aki. Ta p’esey di awo nos ta pidi pueblo di Santa Cruz pa yuda pa e proyecto aki por ser realisa unda cu nos lo tene diferente actividad otro aña pa recauda e fondonan necesario pa nos por logra e proyecto aki y asina pueblo di Santa Cruz por ta orguyoso cu nan a contribui y logra esaki.

Un biaha mas pabien pueblo di Santa Cruz y sigur nos lo sigui lucha pa por crea mas proyectonan cu tin pendiente y cu spera pronto lo por ser logra na bienestar di comunidad. Y tambe un danki na Minister Presidente Evelyn Wever-Croes y Minister di Infrastructura Otmar Oduber pa a kere den e proyecto y nos ta spera cu Gobierno wak e importancia di e proyecto aki pa comunidad y por duna nan aporte na esaki tambe den un comunidad cu mester hopi ayudo social y recreacional.

 

Spread the love
  • 10
    Shares

Leave a Reply

  • (not be published)