Parlamentario Edgard Vrolijk (MEP): “Parlamento tin e poder pa haci e cambionan necesario den e ley di LAFT”

Posted on May 13, 2019, 9:50 am
4 mins

ORANJESTAD, Aruba

1 januari 1986 Aruba a logra su Status Aparte unda cu porfin nos por a papia di ta Baas in eigen huis y cu nos mes por a dicidi riba nos mesun finansas (autonomia financiero). Pero lamentablemente di 2009 pa 2017 Aruba a conoce un maneho financiero desastroso na unda cu nos debe nacional cu tabata core den 40% di nos GDP (2.2 biyon) cu a ser acumula den 23 aña door di diferente gobernacion, AVP bou guia di Mike Eman den solamente 8 aña a sa di redobla esaki y sin conta tur e proyectonan off balance manera Green Corridor, Watty Vos Boulevard y Hospital a conduci cu nos a conoce 90% di nos GDP na debe (4 biyon).

Mike Eman y su KB

Na 2013 Hulanda a realisa cu Aruba su finansas publico ta bayendo den mal direccion. Aki ta unda a firma e Protocol di Diabierna Santo y unda cu Mike Eman a compromete di lo cumpli cu exigencianan di Hulanda pa por tin un finansas publico sostenibel y duradero. Pero na 2014 no a keda Gobierno di Reino nada otro cu duna Mike Eman un KB pa mal maneho financiero y cu CFT a bin haci su investigacion y unda a constata cu nos tabata den careda di 76% di nos GDP na debe. (Di cada florin 76 cen ta bay na paga debe).

Ley LAFT ta inconstitucional

Den e fase aki dia 2 di mei 2015 a firma un protocol unda cu pa no haya un CFT permanente manera di otro islanan, a opta pa traiciona e lucha pa Aruba por a haya su autonomia financiero. Unda cu pa medio di un ley local conoci como LAFT, cu den consehonan di Raad van Advies a indica e tempo ey cu no por duna un organo Hulandes un autoridad pa por aproba un presupuesto di un pais autonomo den Reino. Y cu e ley ta inconstitucional. Pero asina mes AVP a aproba esaki pa impedi cu nan lider Mike Eman un biaha mas lo a haya un KB y un supervision financiero permanente. Pueblo a lanta contra esaki y unda den e lucha aki hopi hende a ser mal bati pero tin tambe cu a bay cera pa motibo di a para pa autonomia financiero di nan pais. Pero asina mes esaki a pasa.

Un biaha mas e LAFT

Pueblo ta compronde cu pa mal maneho financiero di AVP, hasta cu CAFT presente, a sa di manipula y sigui crea mas debe y unda cu tambe pa falta di control debido di CAFT a crea mas debe y cu na 2014 e Debe relata na GDP tabata 76% a finalisa den 90%.

Awo nos di Parlamento e siman aki a ser afronta cu e ley di LAFT unda cu un biaha mas esaki a keda inconstitucional. Den e wega aki lo mi no ta y no lo aproba esaki manera cu el a drenta parlamento. Raad van Advies un biaha mas a papia bon cla cu e ley di LAFT ta inconstitucional. Nos di parlamento tin den nos derecho e poder pa haci e cambionan necesario na e ley aki y cu nos lo haci uso di e derecho aki tambe pa trece e cambionan necesario, p’asina aproba na final un ley cu ta constitucionalmente corecto. Tur locual a bay krom bao di gobernacion anterior nos tin di corigi esaki y sigur percura pa e no pasa nunca mas. Ta p’esey pueblo a scoge nos.

Spread the love

Leave a Reply

  • (not be published)