ORANJESTAD, Aruba

Un di e puntonan cu a bin dilanti durante e encuentro di Minister Paul Croes cu directiva di Stichting voor Verstandelijke Gehandicapten Aruba (SVGA) e siman aki, ta e con e personanan cu limitacion tin e potencial di ta ciudadanonan productivo den nos sociedad. Tin varios ehempel di cuponan di trabou yena pa persona cu limitacion na companianan local, ya pa hopi aña, cu resultado hopi positivo. Minister Paul Croes kier mira mas inclusion di e tipo aki.

E titular di Asunto Social ta haci un yamado ta bay na nos comunidad y na tur companianan cu tin un espacio of un funcion pa un persona cu limitacion cu por apoya e negoshi. “E yamado ta pa acepta e personanan aki; nan ta personanan cu ora bo pone nan haci un trabou, nan ta dedica completamente na e trabou ey,” Minister Croes a bisa indicando cu e ta un ‘win-win’ pa e compania, pa e persona y pa e fundacion.

Naturalmente SVGA y otro fundacionnan similar na Aruba ta hunga un papel importante den e desaroyo y capacitacion di personanan cu limitacion. Papiando cu nan, Minister Croes a ripara un biaha mas cu e personal, guia y lidernan “ta hendenan cu ta totalmente dedica na apoya personanan cu limitacion pa yuda nan haci nan mes util, por haci trabou, obranan di man pa despues wordo bendi, haya fondo pa e fundacion y auto estima pa nan mes.”

Minister Croes ta kere cu Aruba, como un pais desaroya y cu ta para pa derechonan humano, mester tin e sinti social y moral pa acepta nan. Pa varios aña companianan manera Fantastic Gardens y Kooyman ta coopera cu SVGA permitiendo nan clientenan haci trabounan part time cu hopi bon resultado. Hotelnan local Hyatt y Marriott tambe tin trahadornan cu limitacion pa hopi aña caba.

unnamed
Spread the love

Leave a Reply

  • (not be published)