Minister Otmar Oduber: 27 compania a registra den destaho publico pa bin cu incinerator

Posted on January 08, 2019, 5:20 pm
2 mins

ORANJESTAD, Aruba 

Na December a tuma luga un destaho publico (RFP) pa companianan registra nan mes pa forma parti di e proceso pa bin cu un incinerator pa mihor maneho di sushi na Aruba. Un total di 27 compania a inscribi nan mes pa participa den e destaho publico aki. E proceso mester sosode conforme e metodo di ‘Build, Own and Operate’ manera cu a dicidi hunto cu Conseho di Minister y Parlamento, Minister di Desaroyo Teritorial, Infrastructura y Medio Ambiente Otmar Oduber ta splica.

Companianan cu a participa ta di tur parti di mundo manera China, Dinamarca, Latino America, Europa, Merca, Caribe y tambe tin companianan local cu a partner cu companianan internacional. Entre e registracionnan tin nomber di companianan renombra mundialmente, cu ta mustra cu claramente tin atencion y interes pa Aruba. Esaki despues cu a hiba e proceso di Request For Information (RFI) unda cu tambe a haya riba 20 compania cu a mustra interes. E 27 companianan aki lo mester presenta un oferta oficial pa 14 di April.

Minister Oduber a informa cu otro siman ta cuminsa cu e proceso cu ta yama  ‘walk through’ caminda cu tur e companianan aki por ta presente pa haci pregunta cu ainda por ta habri den cuadro di e destaho publico aki. Despues ta sigui un di dos periodo di pregunta pa cualkier pregunta adicional cu e companianan kier haci. Pa dia 14 di April 2019 e ofertanan definitivo mester ta aden di cada un di e companianan aki cu a inscribi nan mes pa den e periodo cu ta sigui di 2 pa 3 luna, e evaluacion tuma luga  di tur e ofertanan cu a drenta. Finalmente lo scoge un compania cu lo bay negocia cu ne, riba e diferente contractnan cu mester cera. Pa despues presenta cu esaki na Parlamento pa nan duna e ‘bendicion’ final pa por cera un contract y cuminsa cu e proceso di construccion di e planta aki cu den futuro (1 aña y mey) lo ta den operacion, cu tecnologia y forma responsabel pa maneha cu sushi na Aruba.

   

Spread the love
  • 2
    Shares

Leave a Reply

  • (not be published)