Minister Glenbert Croes Nos meta ta pa nos hendenan special realisa cu nan ta hopi importante pa nos

Posted on February 14, 2019, 1:35 am
3 mins

ORANJESTAD, Aruba    

E aspecto social di nos Pais a wordo barbaramente neglisha den gobernacion anterior. E consecuencia ta cu e problemanan social a keda empeora sufriendo un decadencia inconcebible. Nos tur sea directo of indirecto ta bibando of sinti e efecto di e problemanan social di nos Pais.

A drenta un Gobierno nobo cu tin desde e prome dia e ser humano central.

Minister Glenbert Croes mientras tanto tin mas cu un aña encarga cu e cartera social y por bisa cu porfin e sector social ta hayando e atencion debido y necesario di Gabinete Wever-Croes.

Mientras tanto e ehecucion di e Crisisplan Social a inicia. Avisonan ta tur caminda visibel riba social media como tambe den diverso corantnan pa di e forma aki crea e consciencia pa percura pa siguridad y proteccion di nos sernan stima.

Pero e Crisisplan ta encera henter nos pueblo den e sentido mas amplio di e palabra. E ta encera proteccion di nos muchanan, di nos adultonan y di nos hendenan special contra negligencia, abuso mental, fisico y sexual. E ta encera promocion di inclusion di nos hendenan special. E ta encera miho cuido di nos hendenan special. Pero e ta encera tambe promocion di convivencia y comunitarismo. Cu ora abo ta wak algo cu no ta bon, pa bo no bira bo cara. NO! Cu ora bo bisiña tin mester saca un man yud’e. Haci e yamadanan necesario pa evita e pio. Gabinete Wever Croes a percura pa tur yamada pa Bureau Sostenemi y tur yamada pa Departamento di Asunto Social ta gratis pa asina e yamada cu por scapa un bida drenta y yega caminda cu e mester yega.

Na mes momento pa tin e balansa di calidad, e mandatario encarga cu Asuntonan Social, cu e unico fin di trece alegria y felicidad cerca nos hendenan special a pone tur goza y baila riba e tononan di Massive Brassband y cu Serenata di Robert Thiel. Tur e clientenan di Ambiente Nobo, Sonrisa y Trampolin pa Trabou a baila, canta, goza y hasta toca. Pues un atardi di hopi satisfaccion sperando cu e alegria den curason di cada un perdura pa largo.

Spread the love

Leave a Reply

  • (not be published)