Mervin Wyatt-Ras: Riba dia internacional di hende muher e anja aki ta refleha riba igualdad di genero y mas concientisacion pa cu discriminacion

Posted on March 09, 2019, 2:13 pm
8 mins

ORANJESTAD, Aruba   

En coneccion cu dia internacional di hende muher Parlamentario Mervin Wyatt-Ras ta felicita tur hende muher na Aruba y ban famia. Desde 1911 ta celebra dia internacional di hende muher. Ariba e dia aki un gran cantidad di actividad ta ser organisa mundialmente pa dedica atencion na logronan economico, social y politico di hende muher. Tema pa e anja aki ta # Balanza pa Mihor. E iniciativa pa 2019 ta igualdad di genero, mas concientisacion di discriminacion y celebracion di logronan di hende muher. 

Si tuma nos pais Aruba por bisa cu apesar di logronan tin ainda mas cu tin cu ser haci pa por tin mas igualdad den genero manera p.e. e pago igual di hende muher. Te ainda den cierto profesion e ser femenino tin un salario mas abou cu esun masculino. Ademas pa loke da trata mentalidad ainda e hende muher apesar cu e por tin un trabou mihor paga cu su pareha e ta comporta su mes dependiente emocional di su pareha. Aunke leynan a ser cambia den beneficio di e ser femenino tog ainda tin hopi hende homber cu ta sinti nan superior na e ser femenino y ta comete abuso y maltrato cu e hende muher y mucha. Pues ta necesario pa sigui cu esfuerzonan pa concientisacion di nos hendenan y pa e.o. haci e ser femenino su auto-estima mas fuerte. Pa loke ta trata politica tambe ta keda e reto pa logra haya mas ser femenino riba listanan politico y riba funcionnan gubernamental of como parlamentario.

Logronan cu si por ser menciona ta cu hende muher casa por traha den gobierno desde anjanan setenta. Na anja 2003 a introduci cambio di ley di stalking y e cambio di nos Codigo Penal pa proteha hende (mucha) muher contra di abuso sexual, tambe den matrimonio. Na anja 2008 a cambia diferente ley pa amplia e verlof di embarazo y parto pa 12 siman y a bira posibel cu e mama trahador despues di parto por cria su baby cu lechi materno na pia di trabao of cu e por kolf lechi na trabao pa por cria su baby. Ademas e hende muher a logra haya aumento di salario ora di malesa. Na anja 2011-2012 a cambia leynan di labor cu ta beneficia e hende muher. Por nota alavez cu mas mucha muhernan ta caba skol di nivel mas halto en comparacion cu mucha hombernan y por nota cu mas mucha muher ta bai den exterior pa studia. Notable ta ademas cu hende muhernan mas y mas ta ocupando puestonan halto den nos comunidad. Tin mas miembro di parlamento femenino. Na anja 2016 di 21 miembro 8 tabata hende muher, esta 38% ta hende muher. Awendia na 2019 30% di parlamentarionan ta femenino. Riba tereno laboral tin mas hende muher activo sinembargo nan ta ubica den trabounan cu ta ricibi menos pago. E hende muher ta traha mas den e.o. sector di cuido y salud, hoteleria y servicio financiero. 

Por nota  cu e salario di e hende muher, en especial den sector di hoteleria, ta mas abou cu di hende homber y hasta pa trabou igual. Esaki a sali na cla despues di un investigacion dor di departamento di labor na anja 2011. Ademas te ainda tin un cantidad di hende muher cu ta biba den situacionnan desfavorabeldi di abuso y maltrato y cu e situacion aki ta ser manteni dor di e mentalidad cu e hende muher ta sint’e dependiente di e hende homber. 

Segun Wyatt-Ras ensenjanza tin un rol importante den educacion di e hende muher y tambe den dun’e tools pa e fortifica su imagen propio y independencia. Wyatt-Ras ta considera cu gobierno y sector priva mester traha hunto pa sostene e ser femenino den su rol como mama. 

Gobierno lo tin cu considera e posibilidad di deeltijdarbeid pa cierto mayornan y aumenta e accesibilidad di centronan di cuido di mucha especialmente pa e mama trahador. Wyatt-Ras ta conclui cu aunke a logra cambia varios ley den parlamento den bienestar di e ser femenino ainda falta pa p.e. trata e uitvoeringsverordening di e Burgerlijk Wetboek cu lo duna e ser femenino ainda mas oportunidad pa igualdad den nos comunidad. E parlamentario ta finaliza felicitando e ser femenino y nos pueblo cu e dia importante aki y ta desea e ser femenino forza pa man den man cu sernan masculino nos sigui cu e lucha pa elimina cualke clase di discriminacion den nos pais. 

image2.jpeg

                 

Spread the love
  • 1
    Share

Leave a Reply

  • (not be published)