Mervin Wyatt-Ras durante conferencia di prensa di AVP: Gobierno ta declara e anja aki como anja di famia pero ta haci net contrario dor di e medidanan

Posted on January 11, 2019, 12:45 am
4 mins

ORANJESTAD, Aruba       

          

Den conferencia di prensa di partido AVP, drs. Mervin Wyatt-Ras despues di a esea pueblo un felis anja a elabora enuanto sector social. Gobierno a menciona cu e anja aki lo ta anja di famia y cuido di nos muchanan. Wyatt-Ras ta di acuerdo cu gobierno ta dedica atencion na nos famianan. Famianan ta e pilar di nos sociedad y den un famia un mucha ta crece y haya tur ingrediente pa por bira futuro di mayan. Gobierno anterior a pone famia hopi central, a sostene famianan en grande. A hisa bijstand pa esnan mas humilde. A duna reparatietoeslag pa esnan cu tin menos cu salario minimo y na pensionadonan, a hisa salario minimo, a duna mayornan di menos recurso schoolkinderentoeslag pa por paga uniform pa bai skol y material necesario pa cu skol. Trai Merdia a ser amplia, tambe esun pa hobennan. A introduci e ley di kinderopvang cu a ser pasa den Parlamento y cu lo mester ser implementa. Tambe a ehecuta e plan integral pa nos hubentud pa crea hobennan fuerte cu alavez ta haci trabou pa comunidad.Gobiero nobo mester sigui cu trabounan cu ya caba a ser inicia, segun Wyatt-Ras. Fraccion di AVP a sostene e fondo di e plan social cu ta regarda 32 miyon pa yuda hobennan cu tin problema. Esaki fraccion ta considera como un continuacion di loke gobierno anterior a bin ta haci pa nos hubentud. Alavez en bista di tur e medidanan e fondo aki lo yuda.Contrario na gobierno anterior cu a fortifica famianan, entre nan esnan vulnerable, e gobierno aki a bin cu medidanan. A hisa BBO y a bin cu reforma fiscal cu a dal especialmente nos famianan humilde straight den nan curazon. E famianan aki tin cu bai lucha mas pa sobrevivi. Den tiendanan prijsnan (t)a subi(endo) y e famianan vulnerable ta sinti esaki directamente den nan cartera. Tambe dor di e refoma fiscal cu lo exihi di comerciantenenan pa no print e diferente BBO’s riba recibo lo haci cu por hisa prijsnan sin cu esaki ta transparente. Di e forma aki e control lo bira mas dificil.Esaki ta bai linja recta cu declaracion di e anja aki como anja di famia. Pueblo a spera  algo otro. Envez di subi, gobierno alavez lo bai kita e reparatietoeslag pa cierto gruponan di entreda entrente februari. Esaki lo ta otro medida contra di nos hendenan y nan famia. Nos hendenan a verwacht hopi mas di e gobierno, entre otro cu gastonan lo baha baha pero a sosode net lo contrario. Segun e parlamentario gobierno mester hinca man den su propio cartera. Gobierno mester baha su gastonan. Envez di pone su hendenan tur caminda, kita directornan pa pone esunnan di dje, gobierno mester bai refleha y pone mas atencion pa comparti y pone e hende mas central.  Netamente e anja di famia gobierno mester refleha pa envez di corta den famianan pa yuda nan. Pa haci posibel cu famianan tin tur condicion rond di nan pa garantisa mihor educacion y futuro di nos hobennan.  Wyatt-Ras ta spera cu anja aki si ora e haci pregunta na ministernan e por haya contesta. Anja pasa esaki no tabata e caso. Su preguntanan no a haya contesta. Apesar di esaki Wyatt-Ras lo sigui haci pregunta den caso ta necesario. Sea cual gobierno tey e y su fraccion lo boga pa mihor calidad di bida pa nos hendenan.  

   

Spread the love
  • 14
    Shares

Leave a Reply

  • (not be published)