Konstrukshon Di Dam Pa Wanta Ola Di Laman Na Cai

Posted on May 17, 2019, 10:30 am
2 mins

KRALENDIJK, Bonaire                   

Otro siman Entidat Públiko Boneiru ta kuminsá ku trabounan pa protehá e kaminda ku ta duna akseso na Lac Cai. Olanan di laman ta menasá di kibra e kaminda bai kuné. Konstrukshon di un dam pa wanta ola di laman mester prevení esaki.

E último añanan bastante parti di tera a disparsé den laman na altura di e kaminda ku ta bai Cai. Gobièrnu ke para e proseso aki, pasobra sino Cai lo bira inalkansabel. Patras di e kaminda tin e área di awa konosí komo ‘Pariba di Cai’. Si laman logra drenta e área aki, esei lo kambia henter e struktura i siklo di awa di Lac. Esaki lo tin konsekuensianan grandi pa naturalesa den área di Lac.

Gobièrnu a laga hasi investigashon. For di e investigashon aki a resultá ku konstrukshon di un dam pa wanta ola di laman ta e mihó solushon pa protehá e área aki. For di 20 di mei nos ta kuminsá ku e trabounan di preparashon i mesora despues di esaki ta konstruí e dam nobo pa wanta ola di laman. Henter e trabou lo dura mas òf menos 6 siman.

E kaminda ku ta duna akseso na Cai lo keda habrí mas tantu posibel. Pa traha e dam pa wanta ola di laman ta usa material di nos isla mes. Esaki ta sostenibel i ta redusí gastu. Ku trùk ta transportá e piedranan hiba e sitio. Naturalmente nos ta purba limitá molèster di transporte i di e trabounan mas tantu posibel i nos ta pidi Bo komprenshon pa e trabounan planiá.       

Konstrukshon di e dam pa wanta ola di laman ta sosodé riba enkargo di Entidat Públiko Boneiru i e finansiamentu ta bini di fondonan di naturalesa ku Reino a pone disponibel.Pa mas informashon tokante e proyekto aki i otro proyektonan di naturalesa wak: www.bibadinaturalesa.com

Spread the love

Leave a Reply

  • (not be published)