KOLEGIO EHEKUTIVO NOBO KE MIRA DETERMINASHON DI HULANDA

Posted on April 10, 2019, 6:14 pm
3 mins

KRALENDIJK, BonaireK

Gezaghebber tin espektativa haltu pa Kolegio Ehekutivo nobo

Boneiru ta spera ku, ora ta trata di futuro di nos isla, sekretario di estado Knops di Relashonnan den Reino lo traha ku e mesun determinashon ku un di su antesesornan, esta AnkBijleveld. Asina e diputado resien nombrá Elvis Tjin Asjoe (MPB), kende den e periodo di gobernashon nobo aki ta responsabel pa Direktorado di Maneho i Sosten, a bisa.

Djamars último Kolegio Ehekutivo nobo ku a kaba di tuma kargo, konsistiendo di diputadonan Tjin Asjoe, Nina den Heyer (MPB), responsabel pa Direktorado di Komunidat i Kuido i Kroon, enkargá ku Direktorado di Planifikashon i Desaroyo, a sera konosí ku minister KajsaOllongren, i sekretario di estado Raymond Knops, ámbos di Asuntunan Interno i Relashonnan den Reino.

Durante un reunion informal ku e mandatarionan hulandes e gobernantenan nobo a hiba palabra brevemente. Promé ku 10-10-10 Tjin Asjoe tabata minister di Asuntunan Ekonómiko i Labor i e tempu ei el a eksperensiá kon desidido Bijleveld a aktua durante desmantelashon di Antia Hulandes. Diputado Nina den Heyer a deklará ku e ta ferwagt un koperashon agradabel ku gabinete Rutte. De fakto Den Heyer a spera ku ya kaba e tabata diputado tempu ku gabinete Rutte a bini na mando. Pa diputado Kroon ta importante pa mas pronto posibel kuminsá traha riba mehorashon di e kamindanan na Boneiru, asina e mandatario a bisa.

Den un diskurso kòrtiku gezaghebber Edison Rijna a bisa ku e tin espektativa haltu di e Kolegio Ehekutivo nobo. Rijna a ekspresá e speransa  ku interes general di Boneiru lo bini na promé lugá. Sekretario Insular Nerry Gonzalez a bisa ku e ta orguyoso ku e Akuerdo Intergubernamental, un palabra ku e último lunanan por sierto a haña e státus di palabra mas usá, asina el a bisa. Boneiru ta rasonablemente riba skema ku e akuerdo. Un di e logronan importante ta e proseso ku a introdusí na luna di mart kaminda mester trata petishonnan di siudadanonan na gobièrnu dentro di un término di seis siman. Esei ta kontribuí na mehorashon di dunamentu di servisio di parti di gobièrnu, asina el a splika.

Minister Ollongren a ekspresá e deseo ku e Kolegio Ehekutivo nobo aki lo nifiká mihó tempunan pa Boneiru. El a enfatisá e importansia di traha huntu i alkansá metanan stipulá konhuntamente. For di man di gezaghebber Rijna, Ollongren a risibí un regalo pa usa na Hulanda. Ainda mester repartí e karteranan di e diputadonan ofisialmente.          

Spread the love
  • 10
    Shares

Leave a Reply

  • (not be published)