Gobierno di Aruba: Celebracion Di E Prome Aña Di Nos Himno Y Bandera Na Maart 1977

Posted on March 14, 2019, 1:03 am
4 mins

ORANJESTAD, Aruba

Riba dia 18 di maart 1976 nos himno y bandera a ser inaugura oficialmente dilanti un multitud di miles di persona den Wilhelminastadion. Esaki tabata e acto di mas emocional cu e pueblo a presencia den su historia. Su aña siguiente, esta na 1977, e pueblo Arubano a celebra e prome aniversario di e echo historico aki.

Comision di celebracion Himno y Bandera

Gobierno di Aruba a nombra y instala un comision cu tabata tin como meta pa organisa diferente actividad pa celebra e gran fecha aki. E comision tabata bao di presidencia di sr. Godfried (Fifi) Eman, mientras cu e otro miembronan tabata sr. Julio Maduro (vice presidente), sr. Tico Kuiperi, sr. E. Jong, sr. Holmo Henriquez, sra. Rhoda Steenhuizen-Frigerio, sr. Albert Eman, sr. August Croes, sr. Atan Lee, sra. Maybelline Arends-Croes, sr. Rufo Odor, sr. Milo Croes y sr. Cobi Angela. Como consehero a fungi sr. Betico Croes.

Den e prome aña di celebracion di nos simbolonan di union y libertad dia 18 di maart 1977, na tur scol bandera di Aruba a wordo hisa oficialmente, mientras nos himno a ser toca y canta door di alumnonan di scol. Tabata prome biaha despues di hopi aña cu un celebracion oficial a tuma lugar na nos scolnan local. Hopi mayor a asisti na e ceremonia oficial aki. Tabata un bista impresionante di mira e bandera di Aruba hisa na diferente lugar oficial di Aruba. Tabata un bon idea di e gobierno insular di Aruba pa stimula nos hubentud pa respeta y aprecia nos himno y bandera.

Parada di celebracion

For di dilanti di oficina principal di gobierno un parada di celebracion cu flambeu a sali mas o menos 7’or di anochi dia 18 di maart 1977. Miles di persona a tuma parti na e parada aki, cual a ser encabesa pa diputadonan, consehero di gobierno y miembronan di Eilandsraad. Un grupo grandi bisti di uniform representando e bandera di Aruba a escolta e personanan ariba menciona. Tur participante na e parada di celebracion tabata carga e bandera di Aruba y flambeu. Tabata un bista unico e anochi ey.

Ceremonia den Wilhelminastadion

Un enorme cantidad di persona cual a representa un mayoria grandi di nos pueblo a yena nos Wilhelminastadion pa presencia celebracion di e prome aña di nos himno y bandera. Tabata un bista hopi colorido, ora e banderanan di Aruba cualnan a wordo carga pa e presentenan a bay laira.

Despues cu e himno di Aruba a ser toca y cu e bandera di Aruba a ser hisa, diferente persona di nos comunidad a hiba palabra, entre otro sr. Fifi Eman, diputado Nel Oduber, sr. Chinto Erasmus, sr. John Hart, sra. Daisy Correa y finalmente consehero general di Gobierno, Betico Croes. Despeus a sigui un show musical tipico.

Pueblo di Aruba por a mira atras riba celebracion di un gran dia caminda a celebra e prome aniversario di himno y bandera haci na un manera masha special.

Gabinete Wever-Croes tin e compromiso pa percura pa e bunita historia aki no bay perdi y ancra esaki pa semper pa asina nos pueblo keda mantene e norma y balornan grandi di nos Himno y Bandera. Ban sigui aprecia y respeta nos simbolonan di identidad.

Spread the love
  • 227
    Shares

Leave a Reply

  • (not be published)