GEMAR BERNABELA A TERMINÁ TRAYEKTO ‘ELEVÁ’

Posted on May 06, 2019, 9:15 am
2 mins

KRALENDIJK, Bonaire

Resientemente Gemar Bernabela a risibí komo promé persona un sertifikado pa motibu ku el a terminá su trayekto di siña i traha (Elevá) na Mangazina di Rei. Entretantu Gemar a drenta servisio na Cocari. Departamentu di sosten sosial i labor di direktorado di Komunidat i Kuido ta duna sosten na tantu hendenan ku un limitashon ku ke traha, komo organisashonnan ku ke tuma hendenan ku un limitashon den servisio.Promé ku Germar a subi merkado laboral el a sigui un entrenamentu intensivo riba tereno di siña i traha na Mangazina di Rei. Einan el a logra deskubrí kua ta su talentonan i kon, sintá den ròlstul, e por hasi uso di su pashon den un ambiente di trabou. Na Mangazina di Rei e partisipantenan ta haña chèns pa traha na diferente sitio di trabou i asina gana eksperiensia. E partisipantenan ta siña vários abilidat di trahadó i asina nan ta haña preparashon pa merkado laboral. Kaminda ku den promé instante Gemar tabata enfoká riba funshonnan atministrativo, despues a resultá ku tòg su pashon ta den sektor di kuido. Despues di un eksitoso periodo di stazje na Cocari, nan a ofresé un trabou. Na Cocari Gemar ta hasi diferente aktividat ku e grandinan ku for di dia ku ela yega a aksept’é ku hopi kariño.Heleen Christiaan di Mangazina di Rei a entregá Gemar su sertifikado i for di man di diputado Nina den Heyer el a risibí un regalito. Señora Den Heyer a felisitá Gemar Bernabela i su famia i e diputado den su diskurso a enfatisá ku Gemar por ta un ehèmpel pa tur hende. Manera e direktor di Direktorado di Komunidat i Kuido sra Silvana Janga Serfilia a indiká den su spich, banda di e sosten ku e unidat di labor, Mangazina di Rei i su dunadó di trabou a ofresé, tabata e perseveransia di Gemar mes ku tabata determinante pa su éksito. Gemar a demostrá ku pa tur hende tin posibilidat riba merkado laboral.   

Spread the love

Leave a Reply

  • (not be published)