Eksitoso Enkuentro Di E Departamentu Di Asuntunan Públiko Di Hulanda Karibense, Aruba, Sint Maarten I Kòrsou

Posted on April 26, 2019, 5:18 pm
2 mins

KRALENDIJK, Bonaire

Resientemente e departamentunan di Asuntunan Públiko di Hulanda, Aruba, St. Maarten i Kòrsou tabatin nan enkuentro ku ta tuma lugá 2 biaha pa aña. E enkuentro bou di e nòmber PIVA tabata eksitoso i di gran balor.  

Djaluna 15 i djamars 16 di aprel miembronan di Plataforma di Informashon Personal (PIVA) di e anterior Antia Hulandes i Aruba a reuní na Kòrsou.  E propósito di e plataforma aki ta pa dialogá dos biaha pa aña i diskutí loke ta nesesario pa garantisá kalidat di datonan personal, un bon registrashon di datonan personal (nobo), fortalesé koperashon entre e islanan i Hulanda i sòru pa yega na tomo di desishon korekto for di un nivel atministrativo.  E tema di e enkuentro e biaha aki tabata ‘Sin vishon no tin mishon, sin akshon no tin éksito’.

E plataforma PIVA ta formá dor di e hefenan di e departamentunan di Asuntunan Sivil di Aruba, Boneiru, Kòrsou, Saba, Statia i Sint Maarten, gabinete di gobernadónan di Aruba, Kòrsou i Sint Maarten, Servisio  Nashonal di datonan di identidat i Ministerio di Asuntunan Interior i Relashonnan den Reino i su direktorado di Informashon di Komunidat i Gobièrnu. No ménos ku 34 persona tabata presente i vários miembro a tene un presentashon. Nan a papia konkretamente tokante futuro i desaroyo di Plataforma PIVA i e akshonnan ku ta nesesario pa laga e ambishonnan ku ta presente kuadra ku e aktividatnan ku ta nesesario pa realisá esakinan.  Awor aki ta na e paisnan enbolbí pa kontinuá ku e trabou i sigui ku digitalisashon kualitativo di datonan personal.

Aña 2019 ta un aña spesial pa e Plataforma PIVA komo e aña aki e ta eksistí 20 aña. E promé presidente di Plataforma PIVA, sr. Pacheco Römer, tambe tabata  presente durante e sena i a kompartí brevemente e historia di PIVA ku tur esnan presente. E Minister di Planifikashon Gubernamental i Servisio Públiko, sr Armin Konket, tambe tabata presente durante e sena festivo. E miembronan ta mira bek riba un enkuentro konstruktivo.


Spread the love

Leave a Reply

  • (not be published)