Durante un impresionante celebracion di su segundo aniversario: “Aruba One Happy Island Lions Club A Huramenta Su Directiva Pa Periodo 2019 – 2020”

Posted on July 08, 2019, 12:25 am
4 mins

ORANJESTAD, Aruba        

E aña cu pasa a resulta uno exitoso na beneficio di comunidad!

Dia 29 di juni ultimo Aruba One Happy Island Lions Club a instala su directiva pa e aña Leonistico 2019-2020, alavez e club a celebra su segundo aniversario. Tabata un anochi hopi ameno y bunita na Indoor Cunuco Restaurant cu a wordo prepara pa e ocasion special aki. E anochi aki a conta cu e grato presencia di Zone Chairman pa Aruba, Bonaire y Corsou Compañero Leon Randolf Luciano; Presidente di Curaçao Lions Club Compañero Leon Mariela Romero; Presidente di Bonaire Lions Club Compañero Leon Edelmira Carolina. 

Durante e anochi aki a duna e relato di aña, mester bisa cu den su segundo aña como club a resalta varios proyectonan manera e.o.  “Beach clean-up” na Plastic beach, Proyecto di Planta Mata den Parke Arikok, Participacion den Simulacro organisa pa Bureau Rampenbestrijding Aruba, Paranda di Bochincha pa nos personanan special, Limpieza na Centro di Barioa Playa Pabou, Proyecto verf scol Santa Teresita cu Aruba Doet, Blood Donor Drive y Caminata den Naturalesa  Banda di esaki a organisa y promove diferente campaña di concientizacion den nos comunidad manera pa ‘Tene Aruba Limpi’, ‘Trafico Conciente’, ‘Conservacion di Mangelnan’, ‘Dia di Paz’. Durante aña cu a transcuri Aruba OHIL Club tambe a organisa varios charla publico e.o. riba e tema di Medio Ambiente, Servicio Boluntario y Comunitario, Malesa di Diabetes y Presion, Lecturanan riba Concientizacion pa un trafico sigur pa Cuerpo Policial, Fundacion Zinnia y FADA. Tambe e club a participa na diferente reunionnan di Zona,  Convencion di Distrito y Instruccion Leonistico. Ademas a organisa diferente actividadnan pa recauda fondo manera e.o. Bingo y Feria di Sopi. Durante e aña cu a transcuri Aruba OHIL Club a ricibi Reconocimento for di Oficina Internacional di Clubnan di Leonnan pa aumento den miembrecia. Un aña exitoso pa cual e club por ta hopi orguyoso pa esaki.

Instalacion Directiva 2018 – 2019:

Durante e bunita anochi aki Presidente Saliente Compañero Leon Ferdinand Curiël asisti pa e Secretario Compañero Leon Carla Martinus a instala Compañero Leon Junior Arends como e Presidente di ‘Aruba One Happy Island Lions Club’ pa e periodo Leonistico 2019 – 2020. Despues di a huramenta como Presidente Compañero Leon Junior Arends a instala su hunta di directiva nobo como lo siguiente: Vice-Presidente Compañero Leon Eugene Dubero, Secretario Compañero Leon Carolina Croes, Tesorero Compañero Leon Ferdinand Curiël y alabes Presidente Saliente, Comisario encarga cu Afiliacion di Miembronan Compañero Leon Raymond Wever, Comisario encarga cu Servicio Comunitario Compañero Leon Doris Lacle- Eugenio, Comisario encarga cu Actividad pa Recuada Fondo Compañero Leon Richard Tromp, Comisario encarga cu Mercadeo y Relacion Publico Compañero Leon Kenia Brito, Coordinador pa Lions Club International Foundation Compañero Leon Neil Norton Thomas, Coordinador di Programa Leonistico Compañero Leon Vanessa Olive y Tail Twister Compañero Leon Angelo Koolman. 

E directiva nobo lo guia e club durante e aña Leonistico 2019 – 2020, cual lo bira un reto pa e organisacion cual tin bunita plan y proyectonan na beneficio di nos comunidad. Aruba One Happy Island Lions Club ta e club di servicio mas jong aki na Aruba y durante su dos añanan di existencia a demostra su derecho di existencia sobresaliente den servicio boluntario na bienestar di nos comunidad.

            

Spread the love

Leave a Reply

  • (not be published)