Durante conferencia di prensa Fundacion Bernadina Growell-Kock a invita pueblo di Aruba pa bishita cas di Bernadina durante un koffiemorgen diadomingo awor

Posted on December 06, 2018, 7:58 am
3 mins

ORANJESTAD, Aruba

Presidente di fundacion Bernadina Growell-Kock,  Mervin Ras, despues di expresa palabranan di condolencia pa un miembro di prensa Burleson y felicita tur boluntario ariba  nan dia a invita pueblo en general pa bin bishita cas di Bernadina Growell-Kock diadominigo dia 9 di december awor di 9a.m.-2 or p.m. E cas ta situa na Brazil 43, pariba di Misa na banda drechi di caminda. Lo bai tin aun koffiemorgen pa recauda fondo pa e fundacion por continua cu su labornan. Mervin Ras a trece padilanti cu desde 2015 e fundacion a lanta y cu desde 2011 e miembronan den un comision a cuminsa organisa actividadnan cu e meta pa recorda y honra loke mama di cultura a haci y nifica pa nos y nos cultura y folklore. A habri un caya na su nomber, a organisa te awor 6 festival di canto dedica na Bernadina, ta participa na paradanan cultural y eleccionnan di dama, damita y damanan grandi cultural. Alavez a laga traha y coloca un relieve di cara di e difunta na Paseo Herencia cu a bai acompanja cu un gran parada cultural banda di hotelanan. E fundacion ta preparando publicacion di un buki informativo tocante e difunta, su logronan y su bida. Tambe ta manteniendo e cas di e difunta. Bernadina a haci un gran trabou pa lanta e promer trio y duo di hende muher “Las campiranas” di cual ainda radio emisoranan aa toca nan cd. Tambe el a  lanta grupo di Aguinaldo, di gaita, e ta promer hende muher cu a participa na festival di tumba y cu a composita cancion pa e festival cu a gana premio. Bernadina no solamente a representa su pueblo aki na Aruba sino tambe den exterior. Pesey mes un grup di amigo a uni pa duna realse na tur loke mama di cultura a laga atras den su cas y na recuerdo pa nos.

Sra. Lena Orman Yarzagaray a elabora encuanto di e actividad. Por bishita e cas unda tin bistirnan, trofeonan, potretnan mueblenan y otro artefactonan cu e difunta a yega di uza. Lo bende snackbox den cual tin diferente snacks manera pastechi, croquette, soestjes, webo yena y cheeseballs y alavez cos dushi manera koeki lerchi, pandushi of drigidek. Lena a invita un y tur pa pasa un rato bishita e cas, sostene un bon causa y pasa un rato ameno.

Sr. Persey Jeandor a trece padilanti cu tin diferente trabou cu a ser y mester ser haci na e cas y cu ta necesario cooperacion di esnan cu por. El a menciona e cura di transhi cu mester di persona  cu por yuda drecha e cura aki na un forma adecuado. Por tuma contacto cu fundacion pa asina duna un sosten.

FInalmente e fundacion ta gradici miembronan di prensa cu semper tey y ta spera cu pueblo di Aruba pasa bishita e cas diadomingo awor.

Spread the love
  • 3
    Shares

Leave a Reply

  • (not be published)