Durante celebracion di su segundo aniversario: Aruba One Happy Island Lions Club A Reconoce Miembronan Cu A Sobresali Durante Aña Leonistico 2018 -2019

Posted on July 08, 2019, 12:05 am
4 mins

ORANJESTAD, Aruba    

2 miembro nobo a wordo instala. 

Den su ultimo discurso como Presidente Compañero Leon Ferdinand Curiël a repasa e aña y a gradici cada uno pa haci e aña como uno exitoso tanto local, den zona y districto. 

Despues di a gradici tur miembro pa nan contribucion, dedicacion y servicio realisa na beneficio di nos comunidad durante e anochi di instalacion di e directiva nobo di ‘Aruba One Happy Island Lions Club’ e presidente saliente Compañero Leon Ferdinand Curiël a reconoce  e miembronan Leon cu a destaca durante e aña cu a transcuri. Compañero Leon Eugene Dubero a ser reconoci como “Lion of the Year” pa aña 2018 – 2019 pa su dedicacion y aporte excepcional na bienestar di e organisacion y comunidad engeneral. Miembronan di directiva diario Compañero Leonnan Secretario Carla Martinus, Tesorero Geraldine Frank y Comisario encarga cu Afiliacion di Miembronan Junior Arends a ricibi cada uno, un bunita plakaat di reconocimento pa nan dedicacion sobresaliente den nan respectivo funcionnan den directiva. Demas miembronan di directiva Compañero Leonnan Armando Boekhoudt, Indra Hassel-Duarte, Leonard Pengel, Richard Tromp, Sergio Duarte y miembronan Carolina Croes, Kenia Brito, Raymond Wever y Angelo Koolman a ricibi un Certificado di Aprecio pa nan dedicacion y aporte na e organisacion y comunidad. Por ultimo e directiva diario den nomber di miembronan di club a duna un reconocimento special na e presidente saliente Compañero Leon Ferdinand Curiël pa su liderazgo y dedicacion demostra como presidente di e club, banda di esaki su persona a ricibi un bunita recuerdo como e presidente fundador di ‘Aruba One Happy Island Lions Club’. 

Instalacion Miembronan Nobo:

Durante e anochi e club di Leonnan ‘Aruba One Happy Island’ a crece den miembrecia. Compañera Leon Doris Eugenio-Lacle, Pasado Gobernador di Club di Leonnan asisti pa Presidente 2018 – 2019, Compañero Leon Ferdinand Curiël a efectua un acto special caminda a instala dos miembro nobo den persona di Srta. Danielle Ivera y Sr. Neil Norton Thomas. Despues cu e miembronan nobo a huramenta den presencia di nan respectivo mentor Compañeronan Leon Carla Martinus y Carolina Croes, nan a ricibi nan pin y certificado como miembro oficial di Club di Leon di ‘Aruba One Happy Island’ y asina pasa pa forma parti di e organisacion di Clubnan di Servicio mas grandi na mundo, Lions Club Internacional. Ser un miembro di un Club di Leon, ta mas bien un forma di biba, caminda cu e miembro Leon ta semper atento pa e desaroyo den nos comunidad y ta cla pa yuda pa un mihor mayan, manera e dicho “Where there’s a need, there’s a Lion”, unda cu tin un necesidad, tin un miembro Leon cla pa yuda.

Gratitud general:

Relaciona cu su segundo aniversario, Aruba One Happy Island Lions Club ta gradici tur su miembronan y nan famia, oficina di Lions Club Internacional, Clubnan ruman den Zona y Districto, e comunidad local, comerciante- local, prensa en general y demas persona-, instancia- y organisacionnan manera e.o. Cuerpo Policial, FADA, Fundacion Zinnia, Rode Kruis, Aruba Reef Care Foundation, Bureau Rampenbestrijding, Aruba Doet, Fundacion Parke Arikok, MFA Santa Cruz y Paradera, Centro di Bario Playa Pabou, Dr. Dellanire Maduro, Sra. Lupita Gil, Sra. Dientje Hassel, Sr. Jose Tromp y tambe Indoor Cunuco, Swingmasters, Party Express y tur otro compania cu a coopera cu e club pa asina por tabata tin un aña exitoso. Aruba OHIL Club ta conta cu mesun cooperacion y sosten di un y tur durante e aña Lionistico nobo.


               

Spread the love

Leave a Reply

  • (not be published)