Drs. Mervin Wyatt-Ras: Minfin A Perde Ambos Zapato Ora Ela Firma E Protocol Cu Hulanda Y Entrega Nos Autonomia

Posted on December 03, 2018, 10:25 am
7 mins

ORANJESTAD, Aruba

Drs. Mervin Wyatt-Ras:

Segun Parlamentario Mervin Wyatt-Ras ta increible pa  kere cu esnan cu tanto a grita den parlamento den pasado cu nan ta defende autonomia di nos pais awe no a pensa ariba esaki ora a firma e protocol 2019-2021 cu Hulanda. A entrega nos autonomia y tanto cu a grita cu ta para den nan zapato awe tin cu admiti cu a perde ambos zapato. E parlamentario hunto cu su coleganan a entrega preguntanan encuanto di presupuesto 2019 dialuna 3 di december. Un presupuesto di cual e cifranan no por ser conecta na maneho concreto y den cual no ta carece na synchronisacion.Den su conseho encuanto di e presupuesto di aki na gobierno, Raad van Advies ta senjala cu envez cu gobierno ta baha su gastonan e ta subi nan, en especial gastonan di personal. Esaki ta contrario na loke e actual minister a grita den pasado den Parlamento cu tin mega debe y mester baha gasto. CAFT tambe den su reaccion ariba e presupuesto di 2019 ta senjala cu gastonan di personal a subi hopi te na 479 miyon. Un aumento di 10 miyon, ademas gastonan di exploitacion of operacion a subi. Aki CAFT ta uza e mesun Beleidsplan Verlaging Personeelslasten (BVP) cu gobierno a traha pa manda gobierno bai baha su gastonan.Den CAFT su conseho ariba e derde uitvoeringsrapportage di presupuesto 2018 tambe e ta constata cu gastonan di gobierno a aumenta barbaramente cu 100 miyon florin na 2018 compara cu e realisacion di 2017. Alavez e ta constata cu e gastonan di exploitatie, esta e gastonan di huur di edificio, oficina, material, ekiponan, servicionan y viahenan a subi cu 14% compara cu 2017. Aki ta trata di un suma di 24 miyon florin. Tambe e gastonan di personal a subi cu 10 miyon.

Parlamentario Wyatt-Ras ta di opinion cu e protocol firma entre gobierno di Aruba y Hulanda pa anja 2019-2021 ta enpugna na nos estado di derecho y nos constitucion. E protocol ta indica cu e “Financieel Economisch Memorandum” di februari 2018 cu gobierno tanto ta gaba cun’e no ta algo di gobierno mes sino ta forma parti di e acuerdo cu Hulanda hunto cu e palabracion cu lo mester reduci e suma di  personal te na 12 miyon. Alavez a palabra cu CAFT cu entradanan incidental no por wordo uza pa cubri gastonan coriente. Aki por nota claramente cu e Minister di Finanzas, e Ministro Presidente y gobierno di Aruba no tin nada di bisa mas, sino ta CAFT ta dicidi ariba asuntonan interno di gobernacion. Aki e minister di Finanzas Xiomara Ruiz-Maduro a entrega Aruba su autonomia na Hulanda.

Contrario na e protocol di 2015 unda a fiha solamente e normanan pa cumpli cun’e respetando gobierno di Aruba su libertad pa e mes dicidi con ta gasta su placa,  awor e gobierno MEPPORRED ta laga CAFT dicidi te hasta cu cuanto placa gobierno tin cu baha e cantidad di personal y gastonan operacional. Tanto e minister di Finanzas actual y Minister Presidente como parlamentario tabata grita den sala di Parlamento manera alma malo cu nan si tin autonomia di pais Aruba na pecho, mientras cu awe ta nan mes a bende nos autonomia y a bende nos patria. Ambos tin cu canta “vele toontjes lager”.  No por lubida tampoco con e ministernan actual cu a firma e e protocol contra nos autonomia, a parti pamfleta contra gobierno anterior di Aruba na tur politico hulandes, hasta na esnan cu ta bende pisca “haring” pafo di Binnenhof, cu e meta pa trece CAFT Aruba y pa Aruba bai bao di curatela. Awe e colebra a sali pica nan mes.

Esaki ta un bofta den cara di nos pueblo orguyoso di nos Status Aparte y nos autonomia.

Ora a trata e ley di CAFT na anja 2015, e ministernan di awe cu tabata parlamentario a trece tur nan activistanan y hasta a haci destruccion na Parlamento y awor kico nan lo bisa e activistanan aki? Na ki adres e activistanan aki  mester bai awor pa exigi un splicasion di e politiconan sin stimacion pa nos pueblo? Pero apesar di esaki gobierno por sigui haci kico cu e kier cu e bendicion di 12 parlamentario. Gobierno lo bai sigui kita mas hende for di trabou paso CAFT a bisa caba cu mester baha e cantidad di personal. Cu introduccion dictatorial di e pakete di belasting nobo atrobe sin consulta cu Parlamento, nos pueblo lo bai sigui sinti consecuencianan di e mal maneho di e gobierno aki. Awor si den futuro comerciantenan lo no mester ni menciona e tipo di BBO riba recibo lo haci cu nos hendenan humilde lo bai paga mas pa nan comestiblenan y otro compranan sin sa ni kico nan ta paga mas. E gobierno aki sin miedo lo bai skonde mas subida di prijsnan ariba e recibonan paso e gobierno aki ta pensa cu nos hendenan ta hendenan keto y humilde y no lo bai reclama. E victimanan di e mal maneho aki lo ta masbien esnan cu ya caba tin un situacion vulnerable den nos comunidad. Nan lo sinti esaki directamente den nan cartera.

 

Spread the love
  • 22
    Shares

Leave a Reply

  • (not be published)