ORANJESTAD,Aruba

Ayera a bira conoci cu Director Jerry Staring a gana un caso cu el a entama contra Minister encarga cu Salubridad. Sinembargo e decision aki a cay manera un baño di awa friu pa e empleadonan y tambe pa gobierno.

Aña pasa despues cu el a wordo manda cas den luna di juni, a instala un Management Team y despues a dicidi di prohibie entrada na DVG. Despues a pone haci otro trabou, mientras cu a inicia preparacion pa haci un “doorlichting” den e departamento.

Como cu no a keda cla, na februari a prolonga e decision aki, di lague haci otro trabou, cu 12 siman. Pero na maart atrobe a dicidi di prolongue cu 12 siman, siendo cu Corte anteriormente a pidi Gobierno pa yega na un decision, mirando cu for di October caba e investigacion a laga haci ta cla.

Pero Minister a splica Corte cu mester tuma un decision riba resultado di esaki, y ta buscando un otro posicion pa Staring y ta contemplando toch si no por pidi su retiro. Pero Corte a bisa cu prolonga e decision pa di tres biaha cu 12 siman ta di mas y esey no ta e pensamento ora cu a traha e articulo di ley aki, cu e por dura pa basta tempo.

A base di esaki a dicidi, cu mientras cu ta sperando riba un decision den bodemprocedure, ta ordena pa laga Jerry Staring haci su trabou como director di DVG.

E decision aki no a cay na agrado di empleadonan di e departamento, kendenan ya caba den diferente carta a señala na Minister y  na nan sindicato, cu Staring no sa con pa maneha e departamento, debi  na falta di conocemento y experticio, pero no ta trata di esaki solamente , manera ya caba a keda menciona den un protesta cu e trahadornan a haci unda cu nan a sali pafo y mustra nan mal contento cu e director.

Segun e trahadornan ya caba den e prome dia di trabao director Staring a yega Salubridad Publico riba su mes hunto cu un medio di comunicacion y a cuminsa exigi cos sin cu minister , su doño di trabao a bise ki dia e ta cuminsa. Trahadornan  tin hopi miedo cu e situacion cu lo surgi aworaki, pasobra si antes e tabata hiba un maneho manera e tabata hiba prome, awo cu el a gana e caso aki, e lo por hasta tuma represalia riba esnan cu ta contra di dje, segun sindicato .

Y esaki, e empleadonan ta haya, no ta na bienestar di un bon funcionamento di e Departamento di Salubridad Publico cu ta un departamento asina importante cu ta trata cu cifranan importante di salud na Aruba. Mirando tur e preocupacionna di e trahadornan y minister encarga tin , ta bisto cu no tin confiansa den e director, esaki a wordo bisa na varios ocacion tambe.

Importante ta pa Minister encarga, sr. Dangui Oduber,  tuma e decision necesario mas lihe posibel pa bienestar di DVG. Sea ta mande pa otro departamento of ta dun’e su retiro, pero haci algo pa e departamento por traha di un forma motiva pa pueblo di Aruba.

No ta conoci kico ta e agenda di director  staring na e momentonan aki mirando cu ta bisto cu e deseo di keda forsa un caminda cu e no ta bon bini pa mayoria trahador ta incomprendibel, segun e sindicato. Tambe ta conoci cu Staring lo a ricibi un carta for di gobierno y na unda cu e la bandona edificio di Departamento di Salubridad Publico den careda di 3:30.  Mayan 22 mei 2019 Sindicato TOPA lo tin un conferencia di prensa riba henter e caso aki.

Spread the love

Leave a Reply

  • (not be published)