Diputadonan Tabatin Konsulta Konstruktivo Ku Miembronan Di ‘tweede Kamer’’

Posted on June 07, 2019, 3:16 pm
2 mins

KRALENDIJK, Bonaire   

Diputadonan Elvis Tjin Asjoe, Nina den Heyer i James Kroon a papia ámpliamente ku miembronan di Komishon di ‘Tweede Kamer’ pa Relashonnan den Reino.

Gustosamente e miembronan di ‘Tweede Kamer’ kier a haña informashon tokante vishon di e Kolegio Ehekutivo nobo di MPB i UPB relashoná ku desaroyo mas aleu di Boneiru, kiko e plannan konkreto ta i na unda ta pone e prioridatnan. Un kantidat grandi di tópiko a bini na vigor. Diputado Den Heyer a mustra riba e echo ku despues di 2010 no a eliminá retrasonan sosial sufisientemente i ku pa e motibu ei e ke rekuperá e retrasonan aki. Diputado Kroon a ekspresá e speransa ku den koperashon ku ministerio di Infrastruktura i Maneho di Awa, porfin lo por kuminsá drecha kaya- i kamindanan na Boneiru. Diputado Tjin Asjoe a duna splikashon tokante e konsepto di Blue Destination, loke por kontribuí na oumentu di prosperidat i bienestar di pueblo boneriano.

E miembronan di ‘Tweede Kamer’ tabata kontentu di tende ku Kolegio Ehekutivo ta traha riba e Akuerdo Intergubernamental ku a sera na luna di novèmber i ku asta Kolegio Ehekutivo ke agregá sierto partinan ku pueblo ta eksperiensiá komo urgente na esaki. E diputadonan a enfatisá ku nan ke hasi tur esfuerso pa un bon entendimentu i koperashon ku e ministerionan i nan a ekspresá e deseo ku ‘Tweede Kamer’ ta sòru pa gobièrnu hulandes tene su mes na e promesa ku el a hasi den su akuerdo di gobernashon di invertí èkstra den mehorashon di e perspektiva ekonómiko, entre otro dor di fortifikashon di infrastruktura i redukshon di pobresa.

Banda di e konsulta ku henter e komishon, e dianan tras di lomba e diputadonan a hiba kombersashonnan bilateral tambe ku miembronan individual di ‘Tweede Kamer’ pa pidi atenshon pa asuntunan ku mester atendé urgentemente kuné, pero pa kua mester di koperashon si di ‘Den Haag’.

Spread the love

Leave a Reply

  • (not be published)