Diputado Elvis Tjin Asjoe: Ta Algu Positivo Ku Munisipionan Ta Dispuesto Pa Kompartí Konosementu I Eksperensia

Posted on June 07, 2019, 11:11 am
41 secs

KRALENDIJK, Bonaire

Kolegio Ehekutivo ta reakshoná positivo riba e plan di ministerio di Asuntunan Interior i Relashonnan den Reino i Asosiashon di Munisipionan Hulandes pa duna mas struktura na e interkambio di empleadonan públiko entre Hulanda Karibense i Hulanda Oropeo.

‘Komo Boneiru pa basta tempu kaba nos tin eksperensia ku ámtenarnan for di Hulanda Oropeo ku temporalmente ta bin traha den nos aparato gubernamental, pero te ku awor esei a sosodé pa sierto tarea spesífiko i no strukturalmente. Durante e kongreso anual di Asosiashon di Munisipionan Hulandes sekretario di estado Raymond Knops i presidente di e Asosiashon di Munisipionan Hulandes Jan van Zanen den presensia di delegashonnan di Boneiru, Saba i Statia a firma un deklarashon di intenshon pa fasilitá kompartimentu di konosementu i eksperensia entre nos islanan i e munisipionan,’ segun diputado Elvis Tjin Asjoe.

‘Di kurason nos ta aploudí e inisiativa aki. Interkambio ta un di e instrumentonan pa logra e profeshonalisashon ku nos ta deseá pa nos aparato gubernamental. Mi a bisa Asosiashon di Munisipionan Hulandes i ministerio di Asuntunan Interior i Relashonnan den Reino ku komo Entidat Públiko Boneiru gustosamente nos ta yuda pensa tokante elaborashon di e idea aki.’      

Spread the love

Leave a Reply

  • (not be published)