Dia Internacional di Persona cu Limitacion 2018 Nos tur tin mesun derecho

Posted on December 04, 2018, 2:21 pm
5 mins

ORANJESTAD, Aruba

Tur aña, riba 3 di december, dia Internacional di Persona cu Limitacion di Estados Unidos ta wordo reconoci. Tur aña riba e fecha aki paisnan rond mundo ta para keto pa reflexiona riba e bida di e persona cu ta biba cu un limitacion di funcion, sea fisico, mental of sensorial (p.e. di bista of oido). Un parti importante den e bida di e PcL ta su famia y otro personanan significante cu ta yuda cu su cuido y cu ta duna sosten.  Esaki ta e red familiar y social cu ta indispensabel pa e sobrevivencia di e PcL. Por lo general por bisa cu nan tambe ta biba cu e limitacion di nan ser keri. Na Aruba e ultimo censo teni na aña 2010 a conta un populacion di casi 7000 persona cu tin un limitacion di funcion. Esaki ta un den cada 15 persona, of sea 6.9% di nos populacion. Si conta e famia acerca por sali afo cu ta considerablemente mas hende kende nan bida ta wordo impacta y cu ta biba cu e limitacion.

E tema 2018 di Estados Unidos pa e dia Internacional di Persona cu Limitacion ta “Empodera persona cu limitacion y sigura inclusividad y igualdad (‘Empowering persons with disabilities and ensuring inclusiveness and equality’)”. Rond mundo e situacion di bida pa e PcL por lo general ta menos faborabel. Cu e tema aki paisnan ta wordo mustra riba e echo cu pa via di e posicion vulnerabel di e PcL, cu mayoria bes (di mes) esaki ta hiba na exclusion for di e dinamismo di un sociedad y na trato no igual. Esaki ta nifica cu pa e PcL logra pa su derechonan humano wordo honra y realisa ta relativamente hopi mas dificil. Pesey ta importante cu e tema internacional ta motiva paisnan y tur cu ta forma parti di su sociedad y comunidadnan pa nan sigui haci e esfuersonan consciente pa fortifica e posicion di personanan cu limitacion, pa inclui nan mas tanto cu ta posibel y pa considera cu nan ta merecido y tin derecho di un trato igual.    

Siguridad di e PcL tambe ta un aspecto cu mundialmente ta haya atencion. Ta di compronde cu si e PcL den su circunstancia di bida no ta rondona cu personanan cu tin su miho interes na pecho, cu esaki por crea un situacion insigur y hasta peligroso caminda e no tin e habilidad y forsa propio di por scapa for di dje. E aña aki ministerio di Asunto Social y departamento di Asunto Social por medio di e Sociaal Crisisplan a enfoca riba e aspecto di Siguridad di e persona cu limitacion mental y a amplia nan maneho pa asina mucha, hoben y adulto cu limitacion mental cu ta biba den situacionnan insigur por wordo kita for di listanan di espera y duna e atencion necesario pa medio di e fundacionnan indica.

Dialuna 3 di december ministerio di Asunto Social y departamento di Asunto Social kier yuda conscientisa nos pueblo Arubano ariba e parti special aki di nos poblacion y ta duna un palabra di apoyo y felicitacion na famianan, amistadnan y conocirnan cu bida largo ta duna cuido y sosten, na tur grupo y organisacion di interes y e Plataforma di organisacionnan cu tin e porvenir y bienestar di Personanan cu Limitacion na pecho y cu ta cuida y proteha specialmente esnan mas vulnerabel. E esfuerso cu boso ta haci ta basa riba e amor pa e ser humano y no por pone un prijs ariba esaki. Ministerio di Asunto Social y departamento di Asunto Social kier gradici famianan y Plataforma pa Persona cu Limitacion (PPL) pa e sosten cu a duna e aña aki y ta invita tur interesado pa hunto nos sigui colabora pa sali na vanguardia pa miho condicionnan di biba y calidad di bida pa nos personanan cu limitacion. Pabien y feliz dia!

 

Spread the love
  • 5
    Shares

Leave a Reply

  • (not be published)