Den su discurso na e Simposio ‘Orange Aruba’ di Fundacion Hende Muher den Dificultad: Prome Minister A Confirma E Compromiso Di Gabinete Wever-croes Pa Caba Cu Abuso Y Violencia Domestico

Posted on December 03, 2018, 3:10 pm
4 mins

ORANJESTAD, Aruba

Prome Minister Evelyn Wever-Croes:

Dialuna mainta, Fundacion Hende Muher den Dificultad (FHMDD) a tene su simposio ‘Orange Aruba’, Campaña contra violencia di hende muher y mucha muher. Na e ocacion aki, Prome Minister Evelyn Wever-Croes a dirigi un discurso relaciona cu e tema aki.

E mandatario principal di nos pais a cuminsa pa gradici Fundacion Hende Muher den Dificultad pa e bunita y importante trabou cu nan ta haci den nos comunidad, brindando proteccion na hendenan muher den dificultad y nan yiunan. Prome Minister a pidi e publico presente pa duna e fundacion un fuerte aplauso como gradicimento pa nan trabou di tur dia.

Prome Minister a indica cu desde 25 di november, cu ta e dia internacional pa elimina violencia contra hende muher, te cu dia 10 di december, cu ta dia di derechonan humano, ta tene 16 dia di accion contra violencia basa riba genero.

“Nos ta dirigi nos enfoke riba eliminacion di violencia contra hende muher y mucha muher rond mundo. Esaki ta e campaña “Orange”. Fundacion Hende Muher den Dificultad e aña aki a mira 110 cliente nobo, sin conta esnan cu a bin mas biaha caba. A duna refugio na 18 mama y 25 yiu.

Dos hende muher e aña aki a wordo mata pa nan pareha, como consecuencia di violencia domestico. Cuanto mucha muher hoben ta biba den temor pa nan pareha, temor pa bisa NO y pa toca nan abuso na man di nan pareha.

Violencia domestico no ta pasa solamente cu adultonan, e ta cuminsa cerca nos hobennan, nos futuro generacion. P’esey e tempo pa cambio ta aki y awor. Ta na nos cada un pa bringa e abuso aki. Nos cada un por pone di nos banda. Si bo sa di un persona cu ta wordo abusa, papia, busca ayudo, convence pa e tambe papia, pa e tambe busca ayudo.

Cada hende muher, mama, cu ta wordo abusa, su yiunan tambe ta wordo abusa. Yiunan inocente, cu henter nan bida nan dilanti, yen di ilusion. Y ki inspiracion nan ta lanta cu n’e cu abuso y violencia? Kico bo ta kere ta pasa cu e muchanan ey ora nan crece?

Bo no kier pa un dia bo lanta mainta, haya un Whatsapp, of lesa corant, y lesa cu ta bo miho amiga a wordo mata pa su pareha, of bo prima, of e yiu di bo bisiña. Ningun di nos lo desea esey. P’esey e tempo pa actua ta aki y awor. E solucion ta den cada un di nos.

Di banda di Gobierno di Aruba mi por confirma un biaha mas nos compromiso pa haci tur locual ta posibel, den e temponan dificil cu nos pais ta atravesa, pa atende cu e retonan social, y pa caba cu abuso y violencia domestico. Nos a institui un comision di e varios instancianan encarga, y nos ta wardando e proposicion di e comision. Financieramente nos pais no ta pasando su miho momentonan, pero nos a haci’e caba pa e crisis plan social, y nos lo bolbe haci’e pa haci di nos parti pa caba cu violencia domestico.

E hende muher tey pa wordo respeta y stima. P’esey ban caba cu violencia domestico. E tempo pa actua ta aki y awor. E solucion ta den cada un di nos. Mi ta desea boso un simposio fructifero, cu Dios bendiciona boso. Masha danki”, ta e palabranan cu Prome Minister a conclui su discurso.

Spread the love
  • 2
    Shares

Leave a Reply

  • (not be published)