Den caso Speeltuin Demanda a keda 15 aña mas TBS

Posted on April 17, 2019, 12:05 pm
4 mins

ORANJESTAD, Aruba

Hof mester bay delibera awo si nan ta dicidi di impone e mesun castigo cu Corte di Prome Instancia a duna Gabriel Martien pa su rol den caso di e rumannan Eugene y Rishandroh, kendenan a perde nan bida a base di e multiple maltratonan ricibi for di e homber aki.Mucho cos nobo no a bini dilanti pasobra apesar cu Martien ta esun cu a apela e decision di Corte di Prome Instancia e tabata poco cooperative cu e tres Huesnan cu a atende e caso awe. For di momento momento cu el a drenta sala y cay sinta tabata manera cu ta obliga el a wordo treci eynan. E no kier a contesta Hues e pregunta di e motibonan pakico el a apela e decision. Tabata despues di basta insistencia, el a bin bisa cu e mester di ayudo. Un ayudo cu Procurador General despues a cuestiona, pasobra desde cu el a wordo condena den Prome Instancia, e no a busca ningun ayudo. Prome el a bisa cu niun hende kier yud’e, pero ora cu PG a bis’e cu ta facil pasobra e por acudi cerca Reclassering. Riba esaki e no kier a sigui papia.Hues a bis’e “tende nos ta aki pasobra abo a apela e caso. Bo ta haci manera cu nos ta molestiabo. Mi ta pidi bo comunica cu nos di un forma normal,” Hues a pidi e acusado. El a wordo puntra entre otro si e tabata dal e mucha cu canti’man so of cu mokete tambe. El a bin admiti cu el a uza su mokete tambe contra por lo menos un di e muchanan. Su problema ta cu e forma e acusacionnan a wordo treci dilanti, esta e forma con e delitonan a wordo cualifica y e kier pa esaki no wordo proba. Probablemente pasobra door di kita e cualicativo aki, e castigo lo por baha. Pero Procurador General a bisa cu tur e delitonan y e formanan cual esaki a wordo hinca den e acusacion a keda proba. PG a bisa cu e no ta mira motibo pa pa desvia di loke a pidi anteriormente den Corte di Prome Instancia, esta 15 aña mas TBS obligatorio. Pero tambe e PG a remarca cu e ta spera cu e caso, ademas di e dolor cu el a causa, mester sirbi pa trece un cambio den comunidad. Pa no laga e casonan yega asina leu prome cu haci denuncia. Presidente di Hof a puntra PG tambe con e tin pensa di regla e TBS pasobra na Aruba no tin un instituto asina’ki. El a splica cu tin combersacionnan andando entre e islanan pa bini cu un instituto asina na Corsou cu lo ricibi pashentnan di Aruba tambe. Pero, si esey no keda concretisa mes, lo haci un aregla cu Hulanda pa acepta e pashent aki den un di e clinicanan cu tin. Pero e ta algo cu tin tempo pa regla ainda, pasobra si e castigo wordo ratifica, ta algo cu lo no bay sosode prome cu e caba di sinta dos tercera parti di e castigo.Aki un luna lo tin sentencia.

Spread the love
  • 8
    Shares

Leave a Reply

  • (not be published)