Corte a aproba pa finalisa contracto cu Hoevertsz

Posted on April 09, 2019, 9:13 pm
2 mins

ORANJESTAD,Aruba

Awe 9 di April Tabatin sentencia den e caso di Franklin Hoevertsz y Utilities. E tabata dos caso den un, pasobra Utilities a pidi pa finalisa e contracto sin compensacion mientras cu Hoevertsz tambe a pidi pa kibra e contracto cu compensacion.
Corte a trata e caso mas o menos un luna pasa y awor a yega na e decision di e decision pa aproba finalizacion di e contracto, y cu pago di un compensacion di un poco mas cu 160 mil florin.
Den sentencia Corte a splica e motibo pakico si a bay di acuerdo cu e compensacion. Asina por ehempel, a bisa cu Utilities ta papia cu el a hiba un mal maneho. Pero Corte ta bisa cu e maneho, unda enberdad e por a haci cosnan diferente, tabata basa riba loke e Gobierno durante ocho aña largo a aproba, pues un plan strategico cu tabata pasa riba un Agenda Berde cu e Gobierno tabata kier pa wordo ehecuta.
E tabata un caso hopi complica pasobra mester tene na cuenta e maneho cu tabatin antes y uno cu e Algemeen Vergadering van Aandeelhouders a dicidi cu mester ta otro. E AVA anterior y e AVA recien tin pensamentonan diferente y esey no por culpa Hoeverstz di dje. Mas bien Corte ta bisa cu Utilities cu e maneho nobo mester a sinta na mesa cu Hoevertsz pa splik’e nan plan y si e por ehecuta e plan ey den nan nomber, Pero niun momento a consulta cun’e y esey a hunga un rol den decision di Corte.
Tambe tabatin aspectonan cu e Abogado a trece dilanti den nomber di Utilities pero niun momento a motiva cu prueba e ponencianan ey of tin ponencianan cu Hoeverstz a trece dilanti pa defende su mes pero e Abogado no a trece informe pa desbarata esakinan.
Como cu no tabatin motibo di peso di parti di Utilities pa finalisa e contracto, Corte a dicidi cu tin motibo pa duna Franklin Hoeverstz un compensacion cu ta yega na mas o menos mey aña di salario.

Spread the love
  • 3
    Shares

Leave a Reply

  • (not be published)