Como Minister di Finanzas mi ta concentra riba e parti financiero pa legalisa e normanan pa yega na un finanzas publico manehabel

Posted on June 10, 2019, 10:29 am
4 mins

ORANJESTAD, Aruba         

COMUNICADO DI PRENSA:

Siman pasa diahuebs Minister Ruiz-Maduro tabata den Parlamento di Aruba pa debati riba e cambio di Ley di supervision financiero di Aruba. Den e ley e normanan financiero pa por yega na un finanzas publico manehabel pa Aruba manera fiha den e Memorandum Financiero y Economico (FEM) y e Protocol di november 2018, a keda stipula legalmente.  Parlamento di su banda a opta pa medio di un amienda pa haci cambionan riba e tereno constitucional manera proponi den conseho di e organo consultativo Raad van Advies.  
Pa locual ta e cambionan presenta, e mandatario a indica cu ‘como Minister di Finanzas di Pais Aruba mi responsabilidad ta concentra pa nos Pais por cumpli cu e metanan cu nos mes a fiha den nos FEM y cu a sirbi tambe como base pa yega na e acuerdo cu Hulanda den e Protocol di november 2018, pa asina nos por yega na un finanzas publico manehabel pa Aruba. Otro cambionan riba tereno constitucional ta keda prerogativo y responsabilidad di Parlamento di Aruba,’ e mandatario a expresa.
Den su disertacion Minister Ruiz-Maduro a trece dilanti cu ‘den e trabou aki no solamente mi mester tene na cuenta e situacion local, pero mi tin cu atende tambe cu e situacion di Aruba dentro di Reino Hulandes y tambe den relacion cu inversionista internacional di cual nos Pais ta depende di dje pa nos desaroyo. Durante e añanan cu a transcuri debi na mal maneho financiero confiansa den Aruba den Reino y pafor riba e tarima internacional a bay perdi. Hopi trabou ta wordo haci pa recupera e confiansa aki, ya cu confiansa bo no por cumpra riba reki na supermercado, e mandatario encarga cu finanzas a expresa. Minister Ruiz-Maduro a sigui bisa cu ‘pesey ta importante cu nos a fiha un caminda pa cana manera stipula den nos propio ‘homegrown plan’ cual ta e FEM y cu riba e caminda aki nos por conta cu e trankilidad cu e Protocol di november 2018 ta brinda nos den Reino Hulandes y tambe pafor di esaki serca instancianan manera IMF, World Bank, inversionista y e companianan di rating Standard & Poor’s y Fitch cu ta companianan cu ta evalua e credibilidad financiero y economico di nos Pais.
E situacion financiero di Aruba no ta bon y nos mester tuma decision y pasonan necesario pa por recupera e credibilidad financiero di Aruba. Mi ta convenci cu tur hende tin bon intencion y boluntad pa Aruba por tin stabilidad financiero y economico, ma e no por keda solamente na boluntad, nos mester tuma decicion pa logra e cambionan cu nos kier mira pa nos Pais. Decicion no tur ora ta facil of popular, pero den e situacion cu nos Pais ta, decision ta sumamente necesario, ta palabranan expresa pa e mandatario.
Na final Minister Ruiz-Maduro a expresa, ‘E caminda pa yega na stabilidad ta yena cu reto y tambe oportunidad. Cu wowo y sinti pa e realidad cu nos ta aden, ta importante pa nos usa nos recursonan na un manera consciente. Nos no por desvia di nos caminda bringando tur bataya cu presenta, ma nos tin cu concentra nos esfuersonan pa nos por yega na un Aruba cu ta fuerte suficiente pa carga nos propio peso.’

           

Spread the love

Leave a Reply

  • (not be published)