Cinco aña invertiendo den nos muchanan Pasa Pret cu Rotaract 2018 hopi mas interactivo y mas grandi cu nunca

Posted on December 04, 2018, 10:04 am
6 mins

ORANJESTAD, Aruba

Den cuadro cu dia internacional di mucha, Pasa Pret cu Rotaract a celebra su di cinco edicion cu wega y actividadnan divertido cual un bes mas a haci hopi mucha contento y trece varios famia hunto pa un dushi dia di actividad.

|E aña aki cu celebracion di Pasa Pret cu Rotaract a bay tremendo y mas miho cu tabata spera.
Den pasado, Pasa Pret cu Rotaract a wordo atendi pa mas o menos 100 mucha pa tur e eventonan cu tabata tin. E aña aki Rotaract a yega na un promedio di 300 mucha of mas cu a participa na e evento sin conta nan famianan cu a compaña nan. “Pa wak e famianan hunto, feliz y contento na un evento gratis cu nos ta duna bek na comunidad ta hopi bunita pa wak”, segun presidente di Rotaract, Ryon Dijkhoff.  Rotaract Club of Aruba ta un club hopi fuerte cu a conta cu boluntarionan regular di nan Club, y como tambe 50 boluntario extra pa e evento aki.

Tabata tin diferente actividadnan manera e huki di arte y  pintamento di cara, careda di douw, careda cu cuchara, street bowling, can knock-down, photo booth, bulamento den saco y hopi mas. Tabata tin un programa di entretenimento bastante extensivo tambe unda cu tabata tin dos DJ; Nutzbeatz cu Tyron Dijkhoff. Tabata tin presente tambe gruponan di baile  Pierewietje y Kids & Youth in Action, hunto cu cinco cantante infantil tambe, Javinah Besselink, Sherdel Maduro, Nyella Thijsen, Alysee Bernabela y Dayenne Croes.

E aña aki e programa tabata mas interactivo pa e muchanan cu e anuncio di weganan pa artenan karikativo, y haciendo cambio den un promocion diferente, acercando diferente scolnan cu kleurplaten cu muchanan por a kleur y trece na e evento pa colga esakinan.
“Nos a escoge pa hacie na Club Caiquetio, den añanan anterior e tabata na e parkinglot di Ling & Sons unda cu awasero a yega di afecta esaki un paar di biaha. Pero nos a escoge e biaha aki Club Caiquetio pa e ta mas fresco”, segun sr. Dijkhoff. E ta sigui bisa cu: “Loke ta special ta cu nos a hacie mas grandi cu nunca cu participacion di 300 mucha, y e decoracion tabata hopi unico haci e aña aki door di D&D events cual realmente a haci un bunita trabou pa trece e ambiente di mucha.”

Inverti den nos muchanan
E projecto aki ta esencial pa Rotaract organisa pasobra no ta tur mucha tin e posibilidad di bay un actividad tur ora y paga p’e. Esaki ta un evento na alcanse di tur mucha, un evento cu entrada cu actividadnan gratis, nan ta haña un paspoort pa hunga tur 11 wega gratis y un regalito na final.
Sr. Dijkhoff: “Mi ta kere cu e mihor inversion cu bo por haci semper ta den nos muchanan, pasobra nan ta e futuro di mañan. Pues pa Rotaract, pa e muchanan tin e derecho di tempo liber ta un di e derechonan den International Declaration of The Rights of Children UN. E derecho di tempo liber y derecho di hunga, ta hopi importante pa nos como club cu ta kere den nos muchanan.”

Centro di diversion

Rotaract a wordo acerca por medio di un di e miembronan di ambulance cu tabata bezig cu proyecto di Superheroes cual nan a haci durante dia internacional di derecho di mucha, unda cu nan a bishita diferente scol pa saluda muchanan den paña di superheroe. Esaki tabata un iniciativa di brandweer y ambulance door cu hopi biaha muchanan ta tende un sirena y nan ta spanta, pues brandweer y ambulance kier conscientisa e muchanan na un manera mas positivo riba nan trabao. “E meta di esey ta pa e muchanan wak e sirena como un heroe cu ta bin pa rescata y yuda bo, esaki tabata algo hopi dibertido pa e muchanan”, segun sr. Dijkhoff. Pa otro aña por spera un otro evento grandi pa e muchanan segun Rotaract. E idea ta pa converti lugarnan den bario den centronan di diversion. Pa otro aña e weganan kisas lo cambia atrobe un poco, y lo bin bek cu e weganan popular.

Rotaract kier a gradici e comision organisatorio den persona di Charelle Felix, Shandeeh Fernandes Pedra, Amedee Wever, Melitza Koolman, Sunny Dodia, y tambe tur miembro di Rotaract Club of Aruba cu a aporta na e evento. Sigur un danki enorme ta bay na artista local y tambe miembro di e comision organisatorio Zia Habibe kende tabata encarga cu tur e artwork di Pasa Pret cu Rotaract. Un danki tambe na tur e boluntarionan, Kiwanis Builders Club of San Antonio, El Louvre Witec, Aruba Airport Authority, Stichting Passaat y tur otro sponsors cu a colabora pa haci e evento aki atrobe un otro exito pa nos muchanan.

 

Spread the love
  • 1
    Share

Leave a Reply

  • (not be published)