Castigo di 18 aña ta colga riba e asesino di Sky

Posted on March 22, 2019, 1:23 pm
4 mins

ORANJESTAD, Aruba

Diabierna mainta Corte a trata e caso contra e mucha muhe Zachary Q., un mama hoben, kende a sali riba un trip cu amigonan, bebe y uza droga y e anochi a finalisa den un tragedia ora cu el a los tres tiro cu un arma di candela di un amigo, cu a alcansa e conocido Sky mortalmente. E hecho aki a sosode dia 18 di augustus, 2018. Awe mainta Corte a trata e caso aki, hunto cu esun di e personanan cu tabata den auto cun’e, y kendenan ta esnan cu a bay buske na su cas pa trip. Tin e chauffeur Joseph B., kende ta doño di e arma, su amiga menor di edad SK, un amigo cu yama Jorchi W., kende ta esun mas grandi di edad den e grupo y Thomas W., kende a sconde e arma den mondi después di e sucedido.Durante tratamento a trata di saca afo si e incidente cu SK a pasa aden mas tempran tabatin di haber cu e caso di tiramento. Ta parce cu pompelonchi di Gang di Madiki, kende tin problema cu Joseph, a los tiro riba e auto den cual SK tabata. Na momento cunan a Sali trip Joseph a dicidi di bay cu su arma. Pero nan a bay zeta nan curpa cu alcohol y droga na Paradera, prome cu nan a baha Playa pa bay hustamente den Rancho. Aki ta caminda cu Zachary pa motibonan desconoci a pidi Joseph pas’e e arma y un poco pabou di e cas di Forno, unda tabatin un of mas miembro di Gang di Madiki para pafo a habri e ventana y los tiro. Sky lo tabata pasando eybanda e momento ey y, según testigonan, después di e prome tiro a tende dado momento un grito y Sky a cay na suela. E auto a huy mesora for di e sitio. Aunke cu e color no tabata difícil pa haya sa di kende e ta: un alteza roos. Y asina investigacion a cuminsa y Zachary dado momento a bay entrega su mes y a admiti cu el a los e tiro. Hues a keda ripiti e pregunta pakico el a tira y su contesta tabata “Mi no sa, mi no sa. Mi tabata high, mi a bebe y usa droga”. E trip aki tin consecuencia serio p’e awo ya cu Fiscal a pidi un castigo di 18 aña incondicional; e mesun castigo a wordo pidi pa Jorchi, kende ta wordo considera complice mescos cu e otronan, y tabata esun di mas edad. Thomas, kende no tabata presente den e auto, pero a sconde e arma, a pidi 12 luna incondicional. Pa Joseph a pidi e máximo cu castigo hubenil ta permiti c uta 4 aña, mientras cu pa e menor SK a pidi pa e wordo interna pa un aña den un instituto cera, unda e por haya e tratamento necesario.

Spread the love
  • 764
    Shares

Leave a Reply

  • (not be published)