Bonairiaanse Tafel tennis Bond A Selebrá Su Di 50 Aniversario

Posted on December 03, 2018, 4:24 pm
47 secs

KRALENDIJK, Bonaire

Durante fin di siman Bonairiaanse Tafel Tennis Bond (BTTB) a selebrá 50 aña di eksistensia. Sr. Junni Vos, presidente di BTTB, primeramente a felisitá tur esnan ku ta aktivo den e deporte di tènis di mesa i alabes a hasi un yamada na hóbennan, spesialmente na mucha muhénan, pa djòin e deporte aki mirando ku aktualmente ta un dama so ta aktivo den e klup. Diputado James Kroon kende no por tabata presente pa motibu di kebrante di salu, a apuntá Yasir Gressmann, sekretario di portafolio di sr Kroon, pa ta presente na apertura di e selebrashon di Bonairiaanse Tafel Tennis Bond. Sr. Gressmann a trese dilanti ku un pabien spesial ta bai na esnan ku te ku awe a hinka nan skouder bou di e organisashon pa asina e deporte di tènis di mesa ta aktivo ya pa añanan. Finalmente sr. Gressmann na nòmber di gobièrnu di Boneiru a deseá e organisashon tur klase di éksito den futuro. Pa sera e parti ofisial presidente Junni Vos huntu ku un representante di IT Connection a hasi entrega di un bunita rekuerdo na sekretario di BTTB sr. Leo Domacasse ku durante tur e añanan di eksistensia di BTTB a hasi un bon trabou.

Spread the love
  • 4
    Shares

Leave a Reply

  • (not be published)