Bes(T) 4 Kids Ta Ofresé Kurso ‘entrená-e-entrenadó’ Di Kaleidoscoop

Posted on June 10, 2019, 2:17 pm
3 mins

KRALENDIJK, Bonaire

Pa fortifiká ekspertisio di personal den akohida di mucha i akohida despues di skol, Sentro pa Hubentut i Famia i Entidat Públiko Boneiru ta organisá kuminsando na ougùstùs 2019 un entrenamentu pa personanan ku un formashon na nivel di HBO ku ke bira entrenadó den e programa pedagógiko Kaleidoscoop.

Kaleidoscoop ta un programa rònt di edukashon ku ta enfoká riba prevenshon di retraso den enseñansa pa mucha di 0 te ku 6 aña, tantu na sentronan pa akohida di mucha komo den grupo 1 i 2 di skol básiko. E método edukativo aki ta enfoká riba desaroyo ámplio di mucha, ku atenshon spesial pa desaroyo di idioma. Su ehekushon ta tuma lugá riba un liña di desaroyo kontínuo for di krèsh te grupo 1 i 2 di skol básiko. Sentro pa Hubentut i Famia i Entidat Públiko Boneiru ta haña importante ku organisashonnan di akohida di mucha ta traha mas tantu posibel a base di un metologia komun. Esaki ta promové e guia i supervishon. P’esei ta di importansia ku dentro di e timnan tin sufisiente konosementu i ekspertisio di Kaleidoscoop. Komo esun ku ta sup-lisensiá pa hasi uso di Kaleidoscoop, Sentro pa Hubentut i Famia ta ofresé e posibilidat pa sigui un kurso di ‘entrená-e-entrenadó’ di Kaleidoscoop.

Un entrenadó di Kaleidoscoop por duna entrenamentu, sosten i ‘coaching’ na trahadónan pedagógiko den akohida di mucha. Por ehèmpel ku e aksento riba ambiente di hunga i siña, programa di dia, interakshon entre adulto i mucha, opservá i registrá, desaroyo i guia di wega i komunikashon ku mayornan. E entrenamentu ta konsistí di 5 biaha 3 dia, repartí den 12 luna i e ta kuminsá na luna di ougùstùs 2019. Sentro pa Hubentut i Famia i Entidat Públiko Boneiru pa gran parti ta finansiá e entrenamentu. Ta pidi e partisipantenan un kontribushon propio.

Kiko bo tin ku kumpli kuné?

Bo a terminá minimalmente un formashon na nivel di HBO ku un base sosial òf pedagógiko. Banda di esei bo tin eksperiensia ku i konosementu di akohida di mucha i dunamentu di entrenamentu, tayer i ‘coaching’. Bo ta interesá? Manda un karta di motivashon i cv pa mas tardá 20 di yüni pa [email protected]. Nos ta invitá interesadonan pa un kombersashon, despues di kua lo selektá 10 kandidato.

Spread the love

Leave a Reply

  • (not be published)