AVP mester stop di manipula cu locual Betico Croes a expresa den e reunion di Eilandsraad di 16 di maart 1976

Posted on March 14, 2019, 3:28 pm
3 mins

ORANJESTAD, Aruba

Ta increibel con e hendenan di AVP ta sigui cu nan actonan di manipulacion y probecho politico caminda den un comunicado emiti na comienso di e siman aki nan a cita Betico Croes di locual el a declara den e reunion di Eilandsraad di dia 16 di maart 1976, esta pa loke ta e fecha di 18 di maart. Claramente por a mira con nan a cita y maluza palabranan cu Betico Croes a expresa den e reunion ey. Den un forma manipulativo e hendenan di AVP a link “18 di maart 1948” na “himno nacional, “bandera oficial” y “Wilhelmina stadion”, siendo cu Betico ningun momento a expresa e palabranan aki den e citacion menciona.

Pero lo tabata bon tambe pa e hendenan aki di AVP por a sigui lesa mas leu den e mesun notulanan di e reunion caminda Betico Croes a declara tambe lo siguiente:

“Señor Presidente, ta di lamenta cu e dos fraccionnan di AVP y PPA tin tanto obheccionnan contra e fecha 18 di maart. Pasobra mi a haci apelacion den nomber di fraccion di Movimiento Electoral di Pueblo, den nomber di mayoria di e pueblo di Aruba, pa nan separa e manifestacion cu e hecho cu awe nos ta bezig ta trata determinacion di nos bandera y nos himno. Si acaso cu e fraccionnan aki mester vota contra e himno di Aruba, lo ta deseable pa skirbi’e tambe den historia di nos himno cu nan a vota contra e himno ARUBA DUSHI TERA. Ademas acaso nan mester vota contra e prome bandera aki, skirbi’e tambe pa e pasa pa historia cu nan a vota contra e  prome bandera di Aruba, e prome bandera cu ta refleha e anhelo di e pueblo pa e por tin un bandera pa e por identifica sumes cune, esta pa e refleha alavez un amor pa su libertad”.

Sinembargo finalmente tur e deseo y advertencianan aki di Betico Croes no a ser scucha ni respeta pa e politiconan di oposicion e tempo ey ya cu na final di e reunion aki tanto AVP como PPA a vota contra nos himno y contra nos bandera.

Ta p’esey mes partido MEP no tin ningun respet pa tur loke AVP ta declara tocante Status Aparte, himno y bandera ya cu semper nan a traha trampa pa trata di laga nos Libertador trompica y a humilianos pueblo votando contra nos himno y bandera precisamente 43 aña pasa, estadia 16 di maart 1976. Un bes traidor, semper traidor!

Spread the love
  • 15
    Shares

Leave a Reply

  • (not be published)