AVP cu menosprecio total pa nos bandera cu ta un di nos simbolonan di union, identidad y libertad

Posted on April 14, 2019, 2:57 pm
5 mins

ORANJESTAD, Aruba 

Diabierna ultimo AVP a tene su manifestacion caminda nan a trece padilanti nan deseo pa un eleccion nobo y esaki despues cu pueblo apenas un aña y mey pasa ya a bay urna electoral y cual tabatin como resultado formacion di Gabinete Wever-Croes sosteni pa 12 miembro di Parlamento. Pues un gobierno solido y democratico y pa cual no tin necesidad pa un eleccion nobo na e momento aki.

Unda e strepinan geel a keda?

Sinembargo locual MEP ta haya condenabel ta e hecho con durante e manifestacion aki, AVP un biaha mas a menosprecia totalmente nos bandera di Aruba, caminda sin ningun tiki di respet y sin ningun amor patrio nan a cana dilanti den e manifestacion presentando un bandera di Aruba sin e dos strepinan geel. Por a mira entre otro lider di AVP Mike Eman y profesor den derecho estatal Santos do Nascimento canando net patras di e bandera aki y haciendo como sifuera cu e menosprecio aki ta completamente normal.

Ta increibel cu despues di 43 aña AVP ainda tin odio y vengansa contra nos bandera nacional, ya cu pueblo ta recorda con dia 16 di maart 1976 den parlamento di Aruba nan a vota contra nos himno y bandera, con nan a gaña e pueblo cu e bandera aki ta di MEP y te hasta un simpatisante di AVP a kima e bandera di Aruba den Lago Sport Park den e temponan ey.

AVP a trapa riba alma di nos pueblo

MEP ta condena totalmente locual a sosode diabierna ultimo, ya cu bandera di un pais ta refleha e union, identidad y libertad di un pueblo y nunca mester ta e meta di AVP pa trapa riba alma, curason y rosea di un pueblo, menospreciando nos bandera nacional.

MEP desde 1976 te cu awe tur dia den aña ta duna respet total na nos bandera. Entre otro pa hopi aña caba riba 17 di maart anochi un marcha cu drumband ta ser teni pa trece e bandera di mas grandi di Aruba y pa mey anochi hisa esaki na su Cede na Santa Cruz.

Ta lamentabel tambe cu un profesor cu tur dia tin su boca yen di derechonan di un pueblo, cu e no tabatin e curashi e atardi ey pa corigi Mike Eman, kende como ex-Prome Minister di Aruba lo mester por tabata sa miho, esta di no trapa riba alma y derecho di un pueblo. Tambe lo ta interesante pa sa kico ta e opinion di un parlamentario manera Mervin Wyatt-Ras pa loke ta e menosprecio grandi aki di nos bandera door di su partido AVP. Su persona como ex-MEP lo mester por sa mihor cu un Eman cu nunca a duna balor na nos identidadnan nacional.

Investigacion ‘ambtshalve’

MEP pa medio di esaki ta suplica Ministerio Publico pa ‘ambtshalve’ tuma carta den henter e asunto aki y investiga locual a tuma lugar diabierna ultimo. MEP ta cita locual ta para den e ley corespondiente, esta den e Afkondigingsblad van Aruba 1991, no. 101; Strafbepalingen:

“Hij die zich in het openbaar laatdunkend uitlaat over de vlag, het wapen of volkslied dan wel de vlag of het wapen bezoedelt, verbrandt of anderszins niet de gepaste eerbied betoont jegens de vlag, het wapen of het volkslied wordt gestraft met hechtenis van tenminste twee maanden of geldboete van ten hoogste drieduiezend florin”.

Lesando e ley aki sin duda por conclui cu AVP a peca na grandi contra nos bandera y cu nan mester wordo penalisa pa esaki. Laga e ley aki no keda como ‘dode letter’, castiga caminda mester castiga y pa den futuro e menosprecio aki no sosode mas.

MEP ta termina cu e siguiente frase cu nos Libertador semper a uza durante henter su lucha pa nos libertad: Un bes traidor, semper traidor!


   

Spread the love
  • 95
    Shares

Leave a Reply

  • (not be published)