ARTE DI PALABRA 2019 DEDIKÁ NA UBALDO ANTHONY

Posted on April 11, 2019, 12:38 pm
4 mins

KRALENDIJK, Bonaire

Djabièrnè awor 12 di aprel ta tuma lugá e kompetensia literario Arte di Palabra Boneiru 2019, evento den kual hóbennan di enseñansa avansá ta kompetí den deklamamentu di poema i kontamentu di kuenta, esaki tantu original (propio) komo ya eksistente. E aña aki atrobe ta na enkargo di Komishon Arte di Palabra Boneiru (ADPB) den koperashon ku gobièrnu di Boneiru pa medio di  Sekshon Kultura Arte i Literatura ‘SKAL’.

E komishon organisadó ta formá pa Djòni Leoneta di SKAL i e dos boluntarionan Juliette Clarenda i Sharsi Anthony.

Manera ta kustumber Kompetensia Arte di Palabra di Boneiru ta sirbi alabes komo klasifikashon di hóbennan pa representá Boneiru den Arte di Palabra ABC, kual e aña aki ta tuma lugá na Kòrsou dia 12 di mei benidero. 

E aña aki pa di tres bes Arte Palabra Boneiru ta dediká na un persona òf organisashon. E rekonosimentu ta pa medio di e asina yamá Premio Literario Pipita di Kònkòmber. Esnan ku ta bini na remarke pa risibí dicho rekonosimentu ta persona òf organisashon ku di un òf otro forma ta duna aporte riba tereno kultural, artístiko i literario, partikularmente pa loke ta nos idioma papiamentu. 

E promé persona ku na aña 2017 a risibí Premio Literario Pipita Kònkòmber tabata RudyDomacasse. Aña pasá tabata e organisashon Bonaire YouthOutreachFoundation (BYOF).

Pa e aña aki ta toka turno na Ubaldo Anthony pa risibí Premio Literario Pipita di Kònkòmber. UbaldoAnthony ta kompositor di letra pa kansion, poeta, deklamadó i komo boluntario na vários manera ta duna su aporte na desaroyo di nos kultura boneriano.  

Igual ku ta e kaso ku Premio Pipita di Kònkòmber, pa Arte di Palabra ABC, Komishon Arte di Palabra Boneiru a skohe tambe Ubaldo Anthony komo esun pa risibí e ya konosí premio Tapushi Literario.

Tur aña ta skohe tambe un lema pa kompetensia Pa Arte di Palabra Boneiru. E biaha aki e lema ta ‘Loke Ta Na Kurason Ta Na Punt’iLenga’. 

E lema aki ku alabes ta un dicho konosí den nos idioma papiamentu, ta duna kontenido i realse na tur e bunita obranan literario kargá ku mensahenan positivo, di motivashon, konsientisashon etc. ku tur aña di nobo hóbennan kompetidó ta presentá den e kompetensia, sea den forma di drama òf humorístiko.  

Arte di Palabra Boneiru 2019 ta tuma lugá djabièrnè awor 12 di aprel pa 7or anochi den Jeugdhuis Jong Bonaire  na Playa.

Un total di diestres hóben representando SGB, LISEO, MBO i FORMA lo kompetí ku otro repartí den kuater kategoria kual ta Poesia Original, Poesia Eksistente, Kuenta Original i Kuenta Eksistente. Partisipantenan ta lo siguiente; LyndonLeito, CarolinePorras, Juriëlla Josephia, Maria-Luisa Troncon, Nadjelly Sumter, Edi-sherray Antonia, Joshua Winklaar, Ovier Maduro, Jefry Sint Jago, Sue-Rani Winklaar, Jo-anndric Mercera, Chelsy Paulina, Jeaniro Dorethea.

Un i tur ta kordialmente invitá pa bin apoyá nos hóbennan den Arte Palabra Boneiru 2019, djabièrnè awor 12 di aprel kuminsando 7or anochi den Jeugdhuis Jong Bonaire. Entrada general ta $ 5.00 i karchi delantá ta optenibel na ofisina di SKAL, serka partisipantenan i si sobra na porta.

Spread the love
  • 11
    Shares

Leave a Reply

  • (not be published)