Analisis:Cuatro persona a solicita pa Hefe di Polis

Posted on March 12, 2019, 4:03 pm
4 mins

ORANJESTAD,Aruba

Algun siman atras a wordo publica den medionan local e solicitud pa candidatonan pa Korpschef. E puesto aki a keda vacante despues cu Dolfi Richardson a tuma su retiro pa bay dedica su mes na otro reto.
Informacionnan cu E Arubiano ta dispone di dje ta indica cu tin 4 persona, 3 hende homber y uno hende muhe, tur miembro di Cuerpo Policial di Aruba, cu a solicita pa e puesto aki, entre otro e actual Korspchef Andrew Hoo. E periodo habri pa solicita ta vence proximamente na april. No ta mustra cu lo tin mas hende local interesa den e puesto aki.
E puesto di Hefe di Cuerpo Policial ta un di e puestonan mas importante na Aruba. E ta un puesto unda cu e persona cu ta bay ocupa esaki mester ta intachabel. Personanan cu den pasado nunca por tabatin rumor of acusacionnan lansa contra nan, ya cu tin un dicho cu semper ta bisa “unda tin huma tabatin candela”.
Den pasado tabatin hopi informacion of denuncia publico haci contra diferente di e candidatonan cu a solicita pa e puesto di Korspchef. Mester bisa cu esaki ya caba ta pone un mancha riba un persona asina. E persona cu mester guia e Cuerpo Policial di Aruba. Por corda denuncianan (no oficial) haci riba funcionarionan halto di Cuerpo Policial kendenan e.o. tabata pidi carchi di actividadnan di carnaval, mientras cu Polisnan no mester di e carchinan aki pa drenta e actividadnan aki pa haci trabou. Pero tambe tabatin peticion cu a wordo haci na hotelnan pa “fabornan personal”, cual no ta cuadra pa e ehempel cu un Polis mester duna.
Tambe e persona cu ta bay ocupa e posicion aki mester tin un amplio conocemento di tur e departamentonan cu e ta bay guia; mester a sigui educa su mes durante su carera y a demostra di por no solamente cu e trabou, pero tambe mantene un bon comunicacion cu su hendenan y di tin tur e habilidadnan di ta un lider.
Pues na momento cu e comision cu ta evalua e solicitudnan repasa e documentonan aki, ta hopi importante pa tene cuenta no solamente cu loke tin poni riba papel, pero mas importante e norma y balornan di cada candidato, cu mester ta un ehempel pa nan coleganan, na prome luga, y den e pueblo. Un imagen intachabel ta prioridad di esun cu ta bay ocupa e puesto aki. No solamente esey, pero tambe mester evalua cu no tin ningun sorto di conflicto di interes di e posibel Hefe di Polis cu su Cuerpo y partido politiconan. Esaki pa evita cu ta lanta e minimo di sospecho cu e por ta actuando parcial debi na su vinculonan cu mundo politico.
E nombramento di e hefe di Cuerpo Policial semper ta un tarea hopi grandi pa e comision cu ta haci e evaluacion pero tambe pa e Minister cu na final tin e decision final, hunto cu Gobierno, pa nombra e persona aki sin interes algun

Spread the love
  • 19
    Shares

Leave a Reply

  • (not be published)