Ampliacion y renobacion di MoU entre IPA y NYU Steinhardt

Posted on March 12, 2019, 5:07 pm
2 mins

ORANJESTAD, Aruba

Ayera 11 maart tawata un dia hopi importante pa IPA pa motibo cu IPA a firma un MoU nobo cu NYU Steinhardt pa un periodo di cuater aña. Ya pa un temporada largo tin colaboracion entre IPA y NYU Steinhardt. E instituto aki a ricibi durante e ultimo 8 añanan studiante di tercer aña di IPA den cuadro di nan pasantia internacional.

Awo cu e MoU nobo a bin un ampliacion grandi cu no solamente lo benificia e studiantenan di IPA pero lo beneficia henter ramo di enseñansa pa motibo di mas colaboracion. E areanan cu IPA y NYU Steinhardt lo colabora ariba ta: investigacion riba tereno di educacion ambiental, training y cursonan di recapacitacion pa maestronan na Aruba riba tereno di liderazgo y STEM (materianan di Ciencia, Tecnologia, Ingenieria y Matematica) y desaroyo di plataforma sostenibel pa percura cu tin un bon ancramento di e conocemento den curiculo y educacion en general.

IPA ta hopi agradecido na NYU Steinhardt pa e bon cooperacion y confiansa cu NYU Steinhardt a brinda nos durante e ultimo 8 añanan y nos ta sumamente entusiama pa sigui cu e ampliacion di e colaboracion aki. Un palabra di danki ta bay pa e personanan di contacto cu a haci esaki posibel, dr. Mary Leou, director di Wallerstein Collaborative for Urban Environmental Educationdi NYU, dr Erich Dietrich, Associate Dean for Global Affairs NYU Steinhardt y dr Paula Kibbelaar, investigado/ docente y International Officer di IPA. Tambe un danki grandi pa e sosten ricibi di Gobierno di Aruba specialmente pa e Minister Plenipotenciario anterior sr. Andy Lee y Minister Plenipotenciario actual sra. Joselin Croes cu a hunga un rol importante den colaboracion aki. Tambe IPA ta gradici Minister President sra. Evelyn Wever-Croes pa su gran aporte pa yuda realisa e MoU.

Spread the love
  • 1
    Share

Leave a Reply

  • (not be published)