Alan Howell tabatin e honor di ta presente durante discurso motivacional di dr. Edward Cheung

Posted on January 08, 2019, 5:11 pm
2 mins

ORANJESTAD, Aruba 

Diamars Alan Howell den su calidad di Vice Presidente di Parlamento tabatin e honor di ta presente na Ibero High School unda un Arubiano cu a resalta internacionalmente, dr. Edward Cheung a duna un discurso motivacional na e studiantenan.

Pa Alan Howell, como persona cu semper a para pa Aruba en general y specialmente pa Pariba di Brug, tabata un placer di por a comparti y scucha e discurso di e Arubiano aki cu a lanta den e bario di Esso Ville na San Nicolas.

Despues cu dr. Cheung a caba Colegio Arubano, el a continua su estudionan na Merca y a haya un oportunidad unico di bay traha na NASA unda cu e tin mas cu 20 aña laborando. Loke a resalta masha hopi mes di dr. Cheung y cu a wordo treci tambe den e discurso ta cu unda cu e bay y durante su trabou, semper e tin e bandera di Aruba cune.

Vice Presidente di Parlamento a expresa cu ta un honor pe di por a topa y duna un di su ‘role modelnan’ Dr. Edward Cheung un “strong handshake”. E ta bisa cu e ta un di su ehempelnan pa sigui debi na loke e ta simbolisa…nada ta imposibel! “Si bo traha duro na scol. Si bo traha duro den bida y si bo meta ta bon fiha, bo ta logra loke bo ta pone bo dilanti!”
E discurso di dr. Cheung tabata uno yena cu motivacion y Alan Howell ta sigur cu no uno, sino mayoria di e studiantenan presente a sinti y biba e motivacion aki pa bay dilanti y logra nan metanan, independendiente di kico nan ta…y nunca lo por sa, por ta entre nan lo tin un siguiente Arubiano cu lo traha na NASA despues di a scucha for di dr. Edward Cheung kico su logronan y su trabounan na e agencia espacial di Merca ta encera.

   

Spread the love
  • 2
    Shares

Leave a Reply

  • (not be published)