Alan Howell Parlamentario Howell a keda defrauda cu e desicion di Minister Xiomara Maduro

Posted on March 12, 2019, 5:05 pm
4 mins

ORANJESTAD, Aruba    

Parlamentario di POR, Alan Howell diamars mainta den conferencia di prensa a lamenta profundamente cu e peticion haci na Minister di Cultura pa realisa e acto protocolario di 18 di maart e aña aki na San Nicolas no a wordo honra.

Motibo di esaki segun e parlamentario por a compronde di Minister Xiomara Maduro ta cu e peticion a drenta hopi laat y cu tur preparativo di e comision di Himno y Bandera pa realisa esaki na Playa tabata cla caba. Mirando cu e minister a contesta d ital manera, mas cu claro parlamentario Howell a haci un peticion mes ora pa 2020. Mirando cu haciendo un peticion na e momento aki pa e acto protocolario tuma lugar na 2020 na San Nicolas, imposibel cu por ta laat cu e peticion aki.

Segun parlamentario Alan Howell esaki ta wordo haci pa por tin tur e tempo necesario pa tur preparativo por wordo haci pa San Nicolas por tin pa prome biaha e celebracion di e acto protocolario aki den aña 2020.

Howell a indica cu e ta sinti su mes decepciona pa e decision tuma door di Minister Maduro di no honra su peticion cu fecha di 29 di januari 2019 pa por tin e acto protocolario di 18 di maart di 2019 na San Nicolas. E ta bisa cu esaki ta net loke pueblo di pariba di brug y San Nicolas no kier a scucha, sino mas bien kier a haya un contesta positivo di e minister.

“Mirando e contesta cu mi a ricibi di minister, cu pa motibo di falta di tempo y pa motibo tambe cu ya a cuminsa prepara tur cos pa Playa, cu tur respet, mi ta haci un peticion di nobo na Minister di Cultura pa den aña 2020 e por tuma lugar na San Nicolas”, parlamentario di POR a indica. El a agrega cu e ta duda cu un hende por bise cu pa 2020 e peticion ta laat atrobe y no ta spera cu lo por bay scucha di minister esaki tampoco.

Honrando e peticion aki ta duna pueblo di pariba di brug e honor y e calor di e celebracion di 18 di maart. E ta un idea cu Alan Howell mes, hendenan di pariba di brug, pero tambe di pabou di brug a haya uno hopi bon y fabuloso. “Mi ta 100% sigur cu e ta na su lugar pa San Nicolas por haya e acto protocolar di 18 di maart un dia na San Nicolas tambe”, Howell a expresa y a haci un yamada un biaha mas na Minister Xiomara Maduro den nomber di pueblo di pariba di brug pidiendo pa e acto protocolar aki tuma lugar na San Nicolas pa asina hendenan di pariba di brug por sinti nan mes parti di e celebracion aki cu entre otro Betico Croes a lucha masha duro pa por a logre.

“Mi ta kere cu nos ta un solo Aruba, un di e visionnan di Betico tabata pa uni nos pueblo y mi ta kere cu den e forma aki, teniendo e acto protocolar aki na San Nicolas, nos lo sa di uni nos pueblo mucho mas, lo haci nos hendenan mucho mas patriotico y nos tur lo sinti e calor di e celebracion fantastico aki, un di e celebracionnan mas grandi di nos pais”, Alan Howell a finalisa bisando.

Spread the love
  • 48
    Shares

Leave a Reply

  • (not be published)