A pidi 12 aña pa Ryson Paskel

Posted on June 14, 2019, 4:32 pm
5 mins

ORANJESTAD, Aruba  

Dia 5 di juli awor pa 8.15 di mainta Ryson Paskel ta haya sa si Corte ta bay di acuerdo cu e demanda di 12 aña fiscal pa asesinato di Camilo Sosa.Tratamento di e caso aki a tuma luga diabierna mainta den presencia di mayor- y amigonan di e victima, kende a wordo hinca mortalmente  dia 2 di september 2018, cu un cuchiu. Tambe ta acus’e di ladronicia riba 28 di october 2017 y di menasa y maltrato dia 29 di juni 2018. E ultimo delitonan aki a wordo repasa hopi lihe pasobra e mes a admiti nan. El a menasa y maltrata un homber cu e ta bisa a abusa sexualmente di su amiga.E hecho aki a sosode den e parkinglot di Arawak Gardens na Palm Beach. Ryson Paskel despues di e acto, a drenta un Toyota Pickup color cora y a huy.  El a keda fugitivo te 30 October 2018, ora cu a gar’e scondi den un cas na Santa Cruz.Den Corte el a declara cu e tabata pasando den parkinglot ora cu Camilo a reclam’e di a horta su auto, cual no ta berdad. Despues a surgi un discusion y Camilo a propin’e poco golpi. Camilo tabata den compania di algun amigo y e tabata su so. Den e pelea su t-shirt a kibra. “Mi wowonan a bira scur ora cu mi a haya e slanan,” el a declara. Henter e sucedido a bay hopi rapido. Entre e momento cu el a bay for di e sitio, y a bolbe pa hinca Camilo, a core apenas 6 minuut. Segun investigacion haci, el a subi su auto y enbes di sigui pa su casa na Tanki Leendert, el a dicidi di bolbe. A pasa dilanti Sandbar, y a bay riba e parkeerplaats patras, unda Sossa cu su amigonan ainda tabatey. “Mi no por a controla mi mes, mi adrenalina tabata demasiado halto,” el a bisa. El a baha for di e auto cu su man tras di lomba a cana bay direccion di Camilo Sosa, kende ainda tabata na e sitio cu su amigonan. A tum’e un minuut pa baha di auto, core direccion di Sosa y proponi’e dos hinca, cu alcansa su curazon y su pulmon. Y despues mesora el a huy for di e sitio. Aki ta caminda cu Fiscal a cuestiona su actuacion. “Pakico bo no a bay bo cas? Bo a dicidi di bira rond y bolbe cu e arma blanco. Y tur cos a bay hopi rapido. Cinco minuut pa bo bolbe y un minuut pa baha for di auto y  hinca Camilo Sosa.” Aunke cu no por proba premedita, segun Fiscal, si por proba cu el a actua intencional. Pasobra e por a bay su cas pero a dicidi di bolbe pa hinca Sosa. E hincanan cu e victima a haya, segn Patalogo a bisa, di ningun manera e hoben por a salba. Nan tabatin 15 centimeter di profundidad y a alcanse den su curazon y pulmon. Na yegada na hospital el a fayece.Fiscal a tene cuenta cu aunke el a haya su mes envolvi cu Polis, pero nunca el a wordo condena. Su edad hoben, pero no por keda sin dun’e un castigo mirando e dolor grandi cu el a causa na e mayornan di Camilo y su amigonan. E ta un dolor cu no ta kita pa awo, of kisas nunca. Bo a causa dos famia dolor grandi. Pa esaki el a pidi 12 aña di castigo.E acusado na final a bisa cu e no kier kita e dolor cu ningun palabra, pero e kier a pidi su disculpa na e famia. Dia 5 di juli pa 8.15 tin sentencia.

  

Spread the love

Leave a Reply

  • (not be published)